Аз номи Раиси шаҳри Душанбе ба собиқадорони маориф туҳфаҳои хотиравӣ ва маблағи 3000 сомонӣ тақдим гардид

ДУШАНБЕ, 05.10.2023. /АМИТ «Ховар»/. 4 октябр дар шаҳри Душанбе Рӯзи омӯзгоронро дар сатҳи баланд таҷлил намуданд. Дар ин чорабинии бошукуҳ ба собиқадорони соҳаи маорифи шаҳри Душанбе аз номи Раиси шаҳри Душанбе туҳфаҳои хотиравӣ ва маблағи 3000 сомонӣ тақдим гардид. Дар ин хусус ба АМИТ «Ховар» дар шуъбаи иттилоотии дастгоҳи Раиси шаҳри Душанбе хабар доданд.

Тазаккур дода шуд, ки ҳамасола якшанбеи аввали моҳи октябр ҳамчун рамзи эҳтиром ба аҳли илму маориф ва тарбиятгари насли наврасу ҷавон бо эҳтирому самимияти хосса Рӯзи омӯзгорон таҷлил мегардад.

Таъкид шуд, ки Раиси шаҳри Душанбе муҳтарам Рустами Эмомалӣ дар доираи сиёсати маорифпарваронаи Пешвои муаззами миллат муҳтарам Эмомалӣ Раҳмон ба соҳаи маорифи пойтахт ва ба ҳаёту фаъолияти омӯзгорон таваҷҷуҳи ҳамешагӣ зоҳир намуда, вобаста ба дастовардҳои назаррас дар таълиму тарбияи насли наврас, иштироки фаъолона дар озмунҳои касбӣ ва дигар чорабиниҳои маданию тарбиявӣ қадрдонӣ ва ҳавасмандгардонии молиявии омӯзгорон иқдомҳои наҷибро ба роҳ мемонад.

Аз ҷониби Раиси шаҳри Душанбе муҳтарам Рустами Эмомалӣ пайваста қадрдонӣ ва ҳавасмандгардонии молиявии ғолибони даври шаҳрии озмунҳои соҳавии «Мураббии сол», «Омӯзгори сол» ва «Хонандаи сол», омӯзгорону мураббиёне, ки шогирдонашон дар озмуну олимпиадаҳои шаҳрӣ, ҷумҳуриявӣ ва байналмилалӣ ғолиб омаданд, ба беҳтар гардидани шароиту имконияти онҳо мусоидат намуда, барои баланд гардидани сатҳу сифати таълиму тарбия дар пойтахт заминаи мусоид фароҳам меорад.

АКС: Сарраëсати маорифи шаҳри Душанбе