Баҳодур Шерализода ва Ҷамил Аҳмад масъалаи тағйирёбии иқлим ва хатари офатҳои табииро баррасӣ намуданд

ДУШАНБЕ, 31.10.2023. /АМИТ «Ховар»/. 30 октябр роҳбари Департаменти робитаҳои байналмилалии Барномаи СММ оид ба ҳифзи муҳити зист дар шаҳри Ню Йорк Ҷамил Аҳмад бо Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода вохӯрӣ намуд, ки дар ҷараёни он масъалаҳои гуногунии биологӣ, рушди устувор, тағйирёбии иқлим, хатари офатҳои табиӣ мавриди баррасӣ қарор гирифтанд. Дар ин хусус ба АМИТ «Ховар» дар Кумитаи ҳифзи муҳити зист хабар доданд.

Тавре иттилоъ дода шуд, бо даъвати Кумитаи ҳифзи муҳити зисти назди Ҳукумати Ҷумҳурии Тоҷикистон аз 29 то 31 октябр сафари кории Ҷамил Аҳмад дар Ҷумҳурии Тоҷикистон доир мегардад.

29 октябр Ҷамил Аҳмад бо Мамнуъгоҳи давлатии табиии «Бешаи палангон», ки дар иҷлосияи 45-ум ба Феҳристи мероси умумиҷаҳонии ЮНЕСКО ворид гардид, шинос шуд.

Ҳадаф аз даъвати Ҷамил Аҳмад ба Ҷумҳурии Тоҷикистон шиносоӣ, иртибот ва табодули афкор оид ба масъалаҳои вобаста ба ҳифзи муҳити зист ва экология ба шумор меравад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон