Дар Беморхонаи клиникии шаҳри Кӯлоб 125 табиб ва 420 ҳамшираи тиббӣ ба беморон хизмат мерасонанд

КӮЛОБ, 17.10.2023 /АМИТ «Ховар»/. Беморхонаи клиникии вилоятии бисёрсоҳавии ба номи А.Ҳақназарови шаҳри Кӯлоб дорои шуъбаҳои эҳёгарӣ, ҷарроҳӣ, кӯдакона, ташхисӣ ва ёрирасон буда, ҳамаи ин шуъбаҳо бо таҷҳизоти тиббӣ таъмин мебошанд. Ҳамаи табибоне, ки бо таҷҳизоти замонавӣ сару кор доранд, аз даврҳои таҷрибаомӯзӣ гузашта, ба аҳолӣ хизмат мерасонанд. Дар ин хусус ба мухбири минтақавии АМИТ «Ховар» мудири шуъбаи бемориҳои кӯдаконаи ин беморхона Суҳроб Сайдалиев иттилоъ дод.

Солҳои пеш, ки беморхона таҷҳизоти зарурӣ надошт, беморон барои табобат ба шаҳри Душанбе мерафтанд. Ҳоло беморон аз тамоми минтақаи Кӯлоб ба ин беморхона меоянд ва сари вақт табобат мегиранд. Табибони беморхона низ ҷавобан бо дастгириҳои Пешвои миллат муҳтарам Эмомалӣ Раҳмон ва Вазорати тандурустӣ ва ҳифзи иҷтимои аҳолии Ҷумҳурии Тоҷикистон кӯшиш менамоянд, ки ба беморон дар сатҳи баланд ва бо муомилаи хуш хизмат расонанд.

Беморхонаи мазкур ҳамасола бо дастгирии Ҳукумати ҷумҳурӣ бо муосиртарин таҷҳизот таъмин мешавад. Ҳоло 34 шуъбаи беморхона дорои 460 кат буда, 125 табиб ва 420 ҳамшираи тиббӣ ба беморон хизмат мерасонанд.

АКС: АМИТ «Ховар»