Дар Марокаш ҳамкории Бонки миллии Тоҷикистон бо Бонки саноатӣ ва тиҷоратии Чин ва Агентии рейтингии Moody’s баррасӣ шуд

ДУШАНБЕ, 15.10.2023. /АМИТ «Ховар»/. Раиси Бонки миллии Тоҷикистон Ҳоким Холиқзода дар доираи ҷаласаҳои солонаи Хазинаи байналмилалии асъор ва Гурӯҳи Бонки Ҷаҳонӣ, ки дар Шоҳигарии Марокаш баргузор гардиданд, бо намояндагони Бонки саноатӣ ва тиҷоратии Чин (ICBC) мулоқот анҷом дод. Дар ин хусус ба АМИТ «Ховар» дар Бонки миллии Тоҷикистон хабар доданд.

Дар мулоқот ҷонибҳо ба тавсеаи ҳамкории дуҷониба таваҷҷуҳ зоҳир намуда, масъалаҳои мавриди назар, аз қабили хизматрасонии хазинадорӣ, хадамоти нигоҳдорӣ, идора намудани дороиҳо, дигар хизматрасониҳои бонкӣ, аз ҷумла имконияти кушодани суратҳисобҳои муросилотии бонкҳои тиҷоратӣ, инчунин васеъ намудани амалиёт тавассути суратҳисобҳои муросилотиро мавриди баррасӣ қарор доданд ва оид ба идома додани ҳамкорӣ дар оянда изҳори омодагӣ баён намуданд.

Раиси Бонки миллии Тоҷикистон ҳамчунин бо намояндагони Агентии рейтингии Moody’s мулоқот анҷом дод.

Зимни вохӯрӣ ҷонибҳо масъалаҳои муҳим, аз қабили фаъолияти бозорӣ, муносибат бо сохторҳои тиҷоратӣ, имкониятҳои васеъ намудани доираи ҳамкорӣ ва дигар мавзуъҳои мавриди таваҷҷуҳро муҳокима намуда, изҳор доштанд, ки дар ин самт гуфтушунидро идома хоҳанд дод.

АКС: Бонки миллии Тоҷикистон