Дар ноҳияи Мастчоҳ маркази хизматрасонии «Спитаменбонк» ба фаъолият оғоз намуд

ДУШАНБЕ, 08.10.2023 /АМИТ «Ховар»/. 5 октябр дар шаҳраки Бӯстони ноҳияи Мастчоҳ маркази хизматрасонии «Спитаменбонк» ба фаъолият шуруъ намуд, хабар медиҳад АМИТ «Ховар» бо истинод ба дафтари матбуоти Раиси ноҳияи Мастчоҳ.

Маркази хизматрасонии бонкии «Спитаменбонк» бо тамоми таҷҳизоти зарурӣ барои хизматрасонии босифати мизоҷон бо роҳи пешниҳоди доираи васеи амалиёти бонкӣ, аз ҷумла бастани шартномаҳо барои пешниҳоди хизматрасонии бонкӣ, кушодани суратҳисобҳо, интиқоли маблағ, пешниҳоди қарзҳои дарозмуддату кӯтоҳмуддат бо фоизи паст ва пешниҳоди кортҳои пардохтӣ муҷаҳҳаз гардонида шудааст. Ҳамзамон дар ин марказ 8 нафар бо ҷойи кор таъмин гардидаанд.

Дар ноҳияи Мастчоҳ намояндагии 6 бонки давлативу тиҷоратӣ фаъолият менамоянд, ки дар нуҳ моҳи соли равон барои рушди соҳибкорӣ, кишоварзӣ, чорводорӣ ва дигар намудҳои  хизматрасонӣ  зиёда аз 98 миллион сомонӣ қарз пешниҳод намудаанд, ки нисбат ба ҳамин давраи соли гузашта беш аз 10 миллион сомонӣ зиёд мебошад.

АКС: Дафтари матбуоти Раиси ноҳияи Мастчоҳ