ОМОДАГӢ БА ЗИМИСТОН. Ширкати саҳомии «Инновейтив Роуд Солюшнз ЛТД» 17 800 тонна маводи зиддилағзиш ва 437 413 литр сӯзишвори дизелӣ захира намудааст

ДУШАНБЕ, 21.10.2023. /АМИТ «Ховар»/. Бо мақсади дар сатҳи зарурӣ гузаронидани  давраи тирамоҳу зимистони солҳои 2023-2024 аз ҷониби филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон барои фаъолияти муназзаму пурмаҳсул дар фасли зимистон дар намояндагиҳои филиали ширкат 437 413 литр сӯзишвори дизелӣ, 17800 тонна маводи зиддилағзиш захира шуда,  ин раванд идома дорад. Дар ин хусус ба АМИТ «Ховар» дар ин ширкат хабар доданд.

Агар  бо мусоид гардидани обу ҳаво дар фаъолияти «IRS» таъмиру таҷдиди роҳ мақоми меҳварӣ дошта бошад, дар мавсими сармо  таваҷҷуҳи масъулин ба рафъи пайомади тармафароӣ, мунтазам тоза намудани роҳ аз барф ва коркарди он бо маводи зиддилағжиш равона мешавад.  Далелу рақамҳо гувоҳи он ҳастанд, ки имсол низ мавсими таъмиру таҷдиди роҳ бо нишондиҳандаҳои арзанда ва барзиёд ҷамъбаст гардид.

Тибқи нақша, дар минтақаи Варзоб 46 050 метри мураббаъ бо масрафи 6595,35 тонна асфалт, дар минтақаи Зарафшон  42821 метри мураббаъ бо сарфи  6072,52 тонна асфалт ва дар минтақаи Суғд 100140 метри мураббаъ бо харҷи 14499,50  тонна асфалт  бояд таъмир мегардид. Ин нақшаҳое буданд, ки филиали «IRS» пешорӯйи худ гузошта, бо  масъулиятшиносӣ, азми қавии кормандон ва истифодаи самараноки имконияти аз ҷониби роҳбарияти «IRS»  фароҳамоварда дар минтақаҳои Зарафшон, Варзоб ва Суғд нақша барзиёд иҷро гардид. 57299,28  метри мураббаъ роҳ дар Зарафшон (134%),  50363  метри мураббаъ дар Варзоб (109%) ва  103237, 94 метри мураббаъ дар Суғд  бо сатҳи хубу сифати баланд таъмир шуд.

Ҳоло кормандони «IRS»  ба мавсими зимистон омодагии ҷиддӣ дида, дар ин раванд ҳолати техникаву механизм ва захираи маводи зиддилағжишу  сӯзишворӣ авлавият дорад.

Илова бар ин, 425 чархи  резинии зимистонаи мошин ва механизмҳои нигоҳдории роҳ дастрас ва насб гардида,  зарфҳои захираи сӯзишворӣ, ки имкони нигоҳдории  535 000 литр чунин маводро доранд,  барқарор  шуданд. Муҳимтар аз ҳама, техникаву механизми филиали ширкат, ки теъдодашон 218 адад аст, ба мавсими зимистон пурра омода мебошанд.

АКС: Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон