Сарвари давлат Эмомалӣ Раҳмон роҳи автомобилгарди дорои аҳаммияти маҳаллии Муъминобод-Ғеш-Чилдухтаронро ба истифода доданд

Октябрь 21, 2023 11:50

ДУШАНБЕ, 21.10.2023. /АМИТ «Ховар»/. 21 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Муъминободи вилояти Хатлон роҳи автомобилгарди дорои аҳамияти маҳаллии Муъминобод-Ғеш-Чилдухтаронро мавриди истифода қарор доданд.

Роҳи мазкур дар доираи нақшаи чорабиниҳо бахшида ба ҷашни 35-солагии Истиқлоли давлатии Ҷумҳурии Тоҷикистон ва дастуру супоришҳои Сарвари давлат муҳтарам Эмомалӣ Раҳмон аз ҷониби роҳбарияти Ҷамъияти дорои масъулияти маҳдуди «Заркорон» дар муддати кӯтоҳ ва мувофиқ ба меъёрҳои сохтмонии муосир бунёд гардидааст.

Ба Пешвои миллат муҳтарам Эмомалӣ Раҳмон иттилоъ доданд, ки масофаи роҳи сохташуда 12 километрро ташкил дода, корҳои сохтмонӣ бо харҷи 10 миллиону 400 ҳазор сомонӣ анҷом дода шудаанд. Роҳи мазкур ба категорияи 4-уми роҳдорӣ шомил мебошад. Дар таъмиру таҷдиди роҳ асосан мутахассисон ва коргарони маҳаллӣ ҷалб гардида, бо маоши хуб таъмин буданд.

Роҳи автомобилгарди дорои аҳамияти маҳаллии Муъминобод-Ғеш-Чилдухтарон барои пайваст шудан ба ноҳияҳои ҳаммарз бо ноҳияи Муъминобод мусоидат менамояд. Сохтмони роҳ махсусан сокинони маҳаллиро, ки ҳамарӯза аз он истифода мебаранд, хушҳол намуд.

Ин роҳ ноҳияи Муъминободро ба ноҳияҳои Ховалинг, Балҷувон ва Темурмалик мепайвандад ва барои гардиши сайёҳони дохилию хориҷӣ шароити мусоидро фароҳам месозад.

Дар ҳамин ҷо инчунин лоиҳаи сохтмони қитъаи роҳи Чашмасор-Лангар, роҳҳои таворавии шаҳри Кӯлоб, сохтмони қитъаи роҳи автомобилгарди Тугарак-Шамсиддин Шоҳин муаррифӣ гардид. Махсус бояд таъкид намуд, ки корҳои лоиҳакашии қитъаҳои роҳи автомобилгарди Чашмасор-Лангар ва Тугарак-Шамсиддин Шоҳин пурра ба анҷом расонида шуда, дар баррасии экспертизаи давлатӣ қарор доранд.

Табиист, ки бунёди роҳҳо ба беҳтар шудани вазъи иқтисодиву иҷтимоии шаҳру ноҳияҳои ҷумҳурӣ ва боло рафтани сатҳи зиндагии аҳолӣ мусоидат намуда, мушкилоти мардумро рафъ месозад. Бо назардошти ҳамин нукта, Ҳукумати мамлакат, хосса Пешвои миллат муҳтарам Эмомалӣ Раҳмон, ба масъалаи бунёду навсозии роҳҳо аҳамияти аввалиндараҷа зоҳир менамоянд.

Дар ноҳияи баландкӯҳи Муъминобод, ки ҳамчун минтақаи сайёҳӣ шинохта мешавад, сол аз сол инфрасохтори соҳаи нақлиёт беҳтар мешавад, ки ин тадбир ба ҷалби бештари сайёҳони дохиливу хориҷӣ мусоидат менамояд.

Лозим ба таъкид аст, ки давоми соли равон аз ҷониби Ҷамъияти дорои масъулияти маҳдуди «Заркорон» дар чанд роҳи автомобилгарди дорои аҳамияти маҳаллӣ корҳои сохтмонӣ ҷараён гирифта, дар маҷмуъ аз ҷониби ин ҷамъият 20 километр роҳ асфалтпӯш карда шудааст.

Ба истифода додани роҳи автомобилгарди аҳаммияти маҳаллидоштаи Муъминобод-Ғеш-Чилдухтарон 21.10.2023

Октябрь 21, 2023 11:50

Хабарҳои дигари ин бахш

Таъмиру таҷдиди роҳи автомобилгарди Чимтеппа-Шарора-Ҳисор оғоз гардид
35-СОЛАГИИ ИСТИҚЛОЛИ ДАВЛАТӢ. Дар Истаравшан 25 иншооти таълимӣ бо 231 синфхона сохта мешавад
Дар Ҳисор сохтмони кӯдакистон ва се муассисаи таҳсилоти умумӣ идома дорад
35-СОЛАГИИ ИСТИҚЛОЛИ ДАВЛАТӢ. Дар ноҳияи Мастчоҳ корхонаи истеҳсоли оҳаксанг ва коркарди сангҳои ороишӣ сохта мешавад
Паёми шодбошии Президенти Ҷумҳурии Тоҷикистон, Пешвои миллат Эмомалӣ Раҳмон ба муносибати ҷашни Сада
НИШАСТИ МАТБУОТӢ. Ба истиқболи 35-солагии Истиқлоли давлатӣ дар Тоҷикистон бунёди 29 009 иншоот ба нақша гирифта шудааст
Президенти Ҷумҳурии Тоҷикистон Эмомалӣ Раҳмон эътимодномаҳои сафирони навтаъини як қатор кишварҳои хориҷиро қабул намуданд
Президенти Ҷумҳурии Тоҷикистон Эмомалӣ Раҳмон ба Президенти Иёлоти Муттаҳидаи Амрико Доналд Ҷон Трамп барқияи изҳори тасаллӣ ирсол намуданд
Президенти Ҷумҳурии Тоҷикистон Эмомалӣ Раҳмон Дабири кулли СААД Имангалӣ Тасмагамбетовро ба ҳузур пазируфтанд
Амрҳои Президенти Ҷумҳурии Тоҷикистон
Қарорҳои Ҳукумати Ҷумҳурии Тоҷикистон
Фармонҳои Президенти Ҷумҳурии Тоҷикистон