Дар Душанбе конфронси байналмилалӣ доир ба мушкилоти ҳифзи пиряхҳо дар заминаи тағйирёбии иқлим доир шуд

ДУШАНБЕ, 15.11.2023. /АМИТ «Ховар»/. 13-14 ноябр Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Созмони ҷаҳонии обуҳавошиносӣ ва дигар шарикони рушд дар мавзуи «Мушкилоти ҳифзи пиряхҳо дар заминаи тағйирёбии иқлим ҳолат, омӯзиш, ташаббусҳои ҷаҳонӣ» конфронси байналмилалӣ баргузор намуд, хабар медиҳад АМИТ «Ховар» бо истинод ба ин кумита.

Конфронс дар доираи пазируфтани ташаббуси навбатии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби Маҷмаи Умумии Созмони Милали Муттаҳид доир ба эълони Соли 2025 – Соли байналмилалии ҳифзи пиряхҳо ва 21 март -Рӯзи байналмилалии ҳифзи пиряхҳо доир шуд.

Иброз гардид, ки бо шарофати сиёсати хирадмандона ва дурандешонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз дар арсаи байналмилалӣ Тоҷикистон ҳамчун давлати пешқадам эътироф гардида, ташаббусҳои глобалиро дар соҳаи иқлим ва об пеш мебарад. Тасдиқи ин гуфтаҳо аз ҷониби Ассамблеяи Генералии СММ қабули қатънома дар бораи Соли байналмилалии ҳифзи пиряхҳо эълон намудани соли 2025 ва Рӯзи ҷаҳонии пиряхҳо эълон доштани 21 март мебошад.

Зимни конфронс дар доираи баромади коршиносони миллӣ ва шарикони рушд оид ба мавзуъҳои «Ташаббусҳои глобалии Ҷумҳурии Тоҷикистон дар соҳаи об ва иқлим», «Таҳким ва рушди ҳамкории давлатҳои Осиёи Марказӣ оид ба масъалаҳои захираҳои об ва муҳити зист», «Омӯзиши пиряхҳои Осиёи Марказӣ», «Омӯзиши пиряхҳои Қазоқистон», «Мониторинги омӯзиши пиряхҳои Узбекистон» «90-солагии Стансияи обуҳавосанҷии ба номи академик Горбунов ва нақши ӯ дар омӯзиши равандҳои обуҳавошиносии Осиёи Марказӣ», «Омӯзиши пиряхҳои Тоҷикистон» ва ғайра маърузаҳо шунида шуданд.

Мақсади асосии конфронс- беҳтар намудани муколамаи минтақавӣ ва огоҳӣ дар бораи тағйирёбии иқлим ва ҳолати пиряхҳо дар қитъаи Авруосиё, фаҳмиши амиқи ҷомеаи ҷаҳонӣ оид ба мониторинг ва омӯзиши ҳолати криосфера ҳамчун яке аз унсурҳои асосии баланд бардоштани муқовимат ба тағйирёбии иқлим, таҳкими ҳамкорӣ ва интиқоли таҷриба байни минтақаҳои Аврупо ва Осиё дар самти омӯзиш ва ҳифзи пиряхҳо ба шумор меравад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон