Ғолибони даври ҷумҳуриявии Мусобиқа оид ба волейбол байни донишҷӯдухтарон муайян ва қадршиносӣ шуданд

ДУШАНБЕ, 20.11.2023 /АМИТ «Ховар»/. Марҳилаи ниҳоии Мусобиқаи варзишӣ оид ба волейбол байни донишҷӯдухтарони муассисаҳои таҳсилоти олӣ ва миёнаи касбии Ҷумҳурии Тоҷикистон ҷамъбаст ва ғолибону ҷоизадорони мусобиқа дар вазъияти тантанавӣ қадрдонӣ шуданд, хабар доданд ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

Чорабинӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Вазорати маориф ва илм дар чор марҳила доир гардида, дастаҳое, ки дар сатҳи вилоятҳо, минтақаҳо ва шаҳри Душанбе ғолиб шуданд, имконияти иштирок дар марҳилаи ниҳоии мусобикаро пайдо намуданд.

Марҳилаи ниҳоии Мусобиқаи ҷумҳуриявӣ оид ба волейбол (духтарон) байни донишҷӯёни муассисаҳои таҳсилоти олӣ ва миёнаи касбии Ҷумҳурии Точикистон аз 14 то 19 ноябр дар шаҳри Кӯлоб доир гардида, дастаҳо бо нишон додани маҳорат ва малакаи хуби волейболбозӣ ба таври зерин зинаҳои ифтихориро соҳиб гардиданд.

Ҷойи якум — дастаи Душанбе-1

Ҷойи дуюм — дастаи Хуҷанд

Ҷойи сеюм — дастаи Хатлон-2

Ғолибону ҷоизадорон аз ҷониби Кумитаи кор бо ҷавонон ва варзиши ҷумҳурӣ ва Бахши кор бо ҷавонон ва варзиши шаҳри Кӯлоб бо ҷом, диплом, медал ва туҳфаҳои хотиравӣ қадрдонӣ шуданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон