Роҳсозони Бадахшон соҳиби чор техникаи замонавӣ гардиданд

ДУШАНБЕ, 23.11.2023 /АМИТ «Ховар»/. Дар Вилояти Мухтори Кӯҳистони Бадахшон масъалаи ҷобаҷокунии техникаҳои муҳандисӣ дар минтақаҳои хавфнок ва омодагии идораву муассисаҳо барои давраи зимистони солҳои 2023-2024 мавриди баррасии роҳбарияти вилоят ва сохтору идораҳои дахлдор қарор дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилоят хабар медиҳад.

Роҳбарияти  Раёсати Кумитаи ҳолатҳои фавқулода ва мудофиаи гражданӣ дар вилоят гузориш пешниҳод намуда, иброз дошт, ки бо мақсади баҳисобгирии ҳаҷми сӯзишворӣ ва маводи зидилағжиши захирашуда дар Муассисаи давлатии нигоҳдории роҳҳои автомобилгарди вилоят ва омодагии техникаю механизмҳои муассиса якчанд корҳо анҷом дода шуданд.

Тазаккур дода шуд, ки бо дастгирии Президенти Тоҷикистон муҳтарам Эмомалӣ Раҳмон имсол роҳсозони вилоят боз соҳиби чор техникаи замонавӣ гардиданд. Аз ин рӯ омодагии муассисаҳои роҳнигаҳдорӣ ба мавсими зимистон бояд дар сатҳи зарурӣ ба роҳ монда шавад.

Таъкид гардид, ки дар ҳолати хуб ва ба талабот ҷавобгӯ нигоҳ доштани роҳҳои мошингард муҳимтарин вазифаи роҳсозон мебошад.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон