Тибқи раддабандии Агентии мустақили аккредитатсия ва рейтинг (IAAR) (IAAR-EUR)-2023 Донишгоҳи миллии Тоҷикистон ба панҷгонаи беҳтарин шомил гардид

ДУШАНБЕ, 14.11.2023. /АМИТ «Ховар»/.  Донишгоҳи миллии Тоҷикистон дар «Рейтинги донишгоҳҳои Агентии мустақили аккредитатсия ва рейтинг (IAAR) (IAAR-EUR)-2023» (IAAR University Ranking (IAAR-EUR)-2023) ба панҷгонаи беҳтарин дохил шуда, дар байни беҳтарин донишгоҳҳои минтақа мақоми 4-умро ишғол намуд. Ҳамчунин Донишгоҳи миллии Тоҷикистон барандаи ҷоизаи «Ситораи сифат»-и (IAAR EUR star Quality) ин агентӣ гардид. Дар ин хусус ба АМИТ «Ховар» дар Донишгоҳи миллӣ хабар доданд.

Донишгоҳи миллии Тоҷикистон аввалин донишгоҳи Тоҷикистон аст, ки тибқи гузориши Агентии мустақили аккредитатсия ва рейтинг ба панҷ донишгоҳи беҳтарин шомил шуда, аз ҷониби коршиносони байналмилалӣ баҳои баланд гирифтааст.

Донишгоҳи миллии Тоҷикистон ба ҷомеаи илмию таълимии ҷаҳонӣ пайваста мутобиқ шуда, ҷиҳати наздик намудани нишондиҳандаҳои худ ба меъёрҳои байналмилалии донишгоҳҳои пешрафтаи ҷаҳон корҳои зиёдеро анҷом медиҳад.

Хусусияти фарқкунандаи натиҷаҳои донишгоҳ дар ин раддабандӣ афзоиши шумораи нашрияҳои илмӣ дар маҷаллаҳои ҷаҳонии индексатсияшуда Q1-Q2 ва инчунин индексатсияи олимони донишгоҳи мо мебошад, ки аз пешрафти корҳои илмӣ шаҳодат медиҳад.

Агентии мазкур (IAAR) аввалин агентии аккредитатсия аз давлатҳои ИДМ мебошад, ки мақоми баланди эътирофи Федератсияи ҷаҳонии таълими соҳаи тиббӣ (WFME) гирифтааст.

Фаъолияти «IAAR» ба стандартҳои кафолати сифати Минтақаи таҳсилоти олии аврупоии «ESG» ва Федератсияи ҷаҳонии таҳсилоти тиббӣ «WFME» мувофиқат менамояд.

«IAAR» аккредитатсияи байналмилалии институтсионалӣ ва махсусгардонида мегузаронад, ки дар сатҳи миллӣ (дар Қазоқистон, Қирғизистон, Тоҷикистон, Молдова) эътироф шудааст, инчунин дар Русия, Руминия, Узбекистон аккредитатсияи байналмилалӣ анҷом медиҳад ва дорои нишони сифати таҳсил дар дигар давлатҳо мебошад.

АКС: Донишгоҳи миллии Тоҷикистон