«ЯК КАМАРБАНД — ЯК РОҲ». Ҳамкории Донишгоҳи давлатии ҳуқуқ, бизнес ва сиёсати Тоҷикистон бо Донишгоҳи педагогии Шэняни Чин тақвият меёбад

ДУШАНБЕ, 13.11.2023 /АМИТ «Ховар»/. Бахшида ба даҳсолаи ташаббуси «Як камарбанд — як роҳ» дар Донишгоҳи педагогии Шэняни Ҷумҳурии Мардумии Чин маросими расмии таъсиси Алянси байналмилалии донишгоҳҳои Авруосиё — Чин дар соҳаҳои маориф, фарҳанг ва санъат ва Форуми байналмилалӣ оид ба табодул ва ҳамомӯзиши тамаддуни Авруосиё баргузор гардид. Дар ин хусус АМИТ «Ховар» бо истинод ба ин донишгоҳ хабар медиҳад.

Дар форуми байналмилалӣ зиёда аз 33 намояндаи донишгоҳ аз 8 давлат иштирок намуданд. Дар ҷаласаи пленарӣ ва кори форум Донишгоҳи давлатии ҳуқуқ, бизнес ва сиёсати Тоҷикистонро декани факултети ҳуқуқшиносӣ намояндагӣ намуд.

Ректори Донишгоҳи педагогии Шэнян, профессор Ян Сун меҳмонон ва иштирокдоронро хайрамақдам гуфта, оид ба  ташаббуси «Як камарбанд — як роҳ» ва дар доираи ин таъсиси Алянси байналмилалии донишгоҳҳои Авруосиё — Чин дар соҳаҳои маориф, фарҳанг ва санъат сухан гуфт.

Иброз гардид, ки таъсиси ин алянс барои амалӣ намудани ҳамкории байналмилалии донишгоҳҳои аъзо, табодули академии донишҷӯён, баргузор намудани таҳқиқоти якҷояи омӯзгорон, рушди лоиҳаҳои инноватсионӣ ва дигарҳо нақши муҳим мебозад.

Баъдан намояндагони расмии шуъбаи маориф ва робитаҳои байналмилалии  вилояти Ляонини Ҷумҳурии Мардумии Чин сухан               гуфтанд.

Ҳамзамон маросими ба имзо расонидани оинномаи Алянси байналмилалии донишгоҳҳои Авруосиё — Чин дар соҳаҳои маориф, фарҳанг ва санъат баргузор гардид.

Донишгоҳи давлатии ҳуқуқ, бизнес ва сиёсати Тоҷикистон узви комилҳуқуқи Алянси байналмилалии донишгоҳҳои Авруосиё — Чин  эътироф ва пазируфта шуд, ки дар оянда барои ба амал баровардани ҳамкории дуҷониба ва бисёрҷониба бо донишгоҳҳои Ҷумҳурии Мардумии Чин ва дигар донишгоҳҳои аъзои Алянс муфид хоҳад буд.

АКС: Донишгоҳи давлатии ҳуқуқ, бизнес ва сиёсати Тоҷикистон