Дар Остона «Бренди миллии Тоҷикистон» муаррифӣ гардид

ДУШАНБЕ, 06.12.2023 /АМИТ «Ховар»/. Дар шаҳри Остона «Бозори XIV байналмилалии хайриявии – ASA» бо иштироки 47 давлат ва ташкилоти хориҷӣ баргузор гардид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад. 

Дар ин чорабинии хайриявӣ Сафорати Ҷумҳурии Тоҷикистон дар Қазоқистон, диаспораҳои тоҷик иштирок намуда, ғурфаи  Тоҷикистонро маҳсулоти баландсифати ватанӣ, аз қабили ширкати қаннодии Ҷамъияти дорои масъулияти маҳдуди «Ширин», корхонаи истеҳсоли об ва маҳсулоти машруботии «Сиёма», ширкати «Асрори санг», асбоби мусиқӣ, саноати дастӣ, донагию мева, ғизоҳои миллӣ ва либосҳои тарроҳони шинохтаи тоҷик зери нишони «Бренди миллии Тоҷикистон» бо сабки хоса ороиш доданд.

Бояд гуфт ки гӯшаи Тоҷикистон ба иштирокдорони чорабинӣ, ки зиёда аз 10 000 нафар буданд, писанд омада, теъдоди харидорони маҳсулоти  ватанӣ   зиёд буд.

Дар ин чорабинӣ тамоми давлатҳои хориҷӣ маҳсулоти истеҳсоли ватании худро ба фурӯш гузошта, маблағи онро ба хона-интернат ва ятимхонаҳо интиқол доданд.

АКС: Вазорати корҳои хориҷии Ҷумҳурии Тоҷикистон