Сарбоз Ҳасани Назар: «Шароити муҳайëгардида дар қисмҳои низомӣ имкон дод, ки дониши худро сайқал дода, сазовори 70000 сомонӣ шавам»
ДУШАНБЕ, 02.12.2023. /АМИТ «Ховар»/. Тавре қаблан иттилоъ додем, 1 декабр дар шаҳри Душанбе ғолибони даври ниҳоии Озмуни ҷумҳуриявии ««Тоҷикон» — оинаи таърихи миллат» муайян гардиданд. Яке аз гирандагони «Шоҳҷоиза» сарбози Вазорати мудофиаи Ҷумҳурии Тоҷикистон дар ноҳияи Данғара Ҳасани Назар мебошад. Хабарнигори АМИТ «Ховар» бо ин сарбози ватандӯсту маърифатпарвар ҳамсуҳбат гардид.
Ӯ сараввал миннатдории худро ба Президенти Ҷумҳурии Тоҷикистон муҳтарам Эмомалӣ Раҳмон ҷиҳати фароҳам овардани шароити арзанда барои хизмати сарбозону ҷавонон баëн намуда, иброз дошт, ки «бо файзи Истиқлолияти давлатӣ ва заҳматҳои ҳамешагии Пешвои миллат имрӯзҳо дар тамоми қисмҳои низомӣ барои обутоби бадан ва сайқал додани дониш шароит муҳайë шудааст. Ҳамин аст, ки дар баробари хизмат дар сафи Қувваҳои мусаллаҳ ҳамзамон дониши худро сайқал дода, сазовори «Шоҳҷоиза» ва 70000 сомонӣ гардидам».
Ҳасани Назар изҳор медорад, ки дар қисми низомӣ китобхона фаъолият менамояд, ки сарбозон дар вақтҳои муайяншуда дар он ҷо ба мутолиаи китобҳои гуногун машғул мешаванд. Ҳамзамон маҳфили «Китобхонҳо» ташкил шудааст, ки хеле шавқовар мегузарад.
Новобаста аз он ки ӯ сарбоз аст ва масъулияти ҳифзи Ватанро бар дӯш дорад, мегӯяд, ки агар шахс завқу шавқи китобхонӣ дошта бошад, дар дилхоҳ кору масъулият фурсати китобхонӣ ёфта метавонад.
Ба гуфтаи ӯ, мутолиаи ин асар дар замони муосир хеле муҳиму муфид аст. Аз ин рӯ хондан ва дарки маънову мафҳуми ин шоҳасар вазифаи хурду бузурги миллати тоҷик, бахусус насли наврасу ҷавон мебошад.
«Тоҷикистон Ватани азизи ман аст, аз ин рӯ ҳамчун сарбози ватан на танҳо барои ҳимояи он камар мебандам, балки барои пос доштани арзишҳои он саъю талош намуда, ҳамчун фарзанди дилбандаш пайваста ба мутолиаи таърихи ниëгон шуғл варзида, барои пешрафти он хизмат менамоям»,- гуфт Ҳасани Назар.
Ёдовар мешавем, ки Озмуни ҷумҳуриявии ««Тоҷикон» — оинаи таърихи миллат» соли аввал аст, ки таҳти сарпарастии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баргузор гардид. Озмун ба дарёфти чеҳраҳои нав, наврасону ҷавонони лаёқатманд, худшиносу худогоҳ, ватандӯст ва таърихдон мусоидат менамояд.
Зарангези ЛАТИФ
АМИТ «Ховар»
АКС: АМИТ «Ховар»
Дар Москва шоми ёдбуди Мирзо Турсунзода баргузор гардид
Дар Тоҷикистон Рӯзҳои фарҳанги Федератсияи Русия оғоз гардид
Дар даври шаҳрии Озмуни ҷумҳуриявии «Илм — фурӯғи маърифат» дар Ҳисор беш аз 1400 довталаб маҳорат месанҷанд
Дар ноҳияи Рӯдакӣ даври ноҳиявии Озмуни ҷумҳуриявии «Илм — фурӯғи маърифат» оғоз шуд
Таҳти унвони «Меандешам пас ҳастам» намоиши осори Рассоми халқии Тоҷикистон Сӯҳроб Қурбонов оғоз гардид
Дар Фестивали байналмилалии «Интермузей. БРИКС+» густариши ҳамкорӣ байни осорхонаҳо баррасӣ шуд
Дар Донишгоҳи технологии Тоҷикистон даври якуми Озмуни ҷумҳуриявии «Донандаи беҳтарини асарҳои Пешвои миллат» доир гардид
Бахшида ба 35-солагии робитаҳои бародаршаҳрӣ байни Душанбе ва Санкт-Петербург дар Осорхонаи миллӣ намоиши аксҳо ифтитоҳ ёфт
Аъзои ҳайати шаҳри Санкт-Петербург дар Осорхонаи миллӣ бо давраҳои пурифтихори таъриху фарҳанги бостонии тоҷикон шинос шуданд
Дабири кулли САҲА дар Осорхонаи миллии Тоҷикистон бо тамаддуни миллати тоҷик шинос шуд
Рушди ҳамкории фарҳангии Тоҷикистону Қирғизистон баррасӣ шуд
«…МОДАР ЯКТОСТ, ТОҶИКИСТОН ЯКТОСТ…». Ба зодрӯзи Шоири халқии Тоҷикистон устод Лоиқ Шералӣ 85 сол пур шуд
