ТАРБИЯИ ВАТАНДӮСТИИ ШАҲРВАНДОН. Доир ба он дар Кумитаи телевизион ва радиои Тоҷикистон мулоқоти судманд баргузор шуд

Декабрь 3, 2023 15:10

ДУШАНБЕ, 03.12.2023 /АМИТ «Ховар»/.  Дар Кумитаи телевизион ва радиои назди Ҳукумати Ҷумҳурии Тоҷикистон вохӯрии Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода бо кормандони соҳаи телевизион ва радио доир шуда, дар он омӯзиши муҳтавои Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» ва ҷараёни татбиқи ин санади меъёрию ҳуқуқии муҳим дар ҷомеа, бахусус тавассути расонаҳои пуриқтидор, ба мисли телевизион ва радио мавриди баррасӣ қарор гирифт. Дар ин хусус АМИТ «Ховар» бо истинод ба Кумитаи телевизион ва радио хабар медиҳад.

Дар оғози мулоқот Раиси Кумитаи телевизион ва радиои  назди Ҳукумати Ҷумҳурии Тоҷикистон онро яке аз се қонуни сирф миллӣ дар даврони соҳибистиқлолӣ номида, қабулу татбиқи онро бо назардошти хусусияти ҷомеа  муҳиму саривақтӣ арзёбӣ намуд.

Раиси Кумитаи кор бо ҷавонон ва варзиш доир ба зарурати таҳия, моҳият ва ҳадафҳои ин қонун изҳор дошт, ки дар шароити зудтағйирёбандаи равандҳои ҷаҳони муосир барои ҳифзу ҳимояи арзишҳо ва ҳувияти миллӣ, инчунин муқовимат ба таъсири манфии ақидаву ғояҳои бегона дар ҷомеа таҳия ва татбиқи чунин санади меъёрию ҳуқуқӣ дар шакли қонун ба амал омад. Татбиқи босамари он дар бисёр маврид аз истифодаи фаровони иқтидори аҳли зиёи мамлакат, сохторҳои давлатӣ ва ҷамъиятӣ вобастагии зиёд дорад. Дар ин радиф телевизион ва радио ба сифати василаҳои муқтадири афкорсоз дар ҷомеа дар самти баланд бардоштани ҳисси ватандӯстии шаҳрвандон метавонанд вазифаи муҳимро иҷро намоянд.

Раиси Кумитаи телевизион ва радио ба шабакаҳои телевизионӣ ва радиоӣ дастур дод, ки бо мақсади мусоидат дар татбиқи босамари Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» фаъолиятро боз ҳам тақвият бахшида, таҳия ва пахши барномаву гуфторҳоро дар мавзуи ватандӯстӣ бештар намоянд ва бо ҷалби мутахассисони соҳа ва аҳли зиё шарҳу тавзеҳи қонунро тавсеа бахшанд.

Мулоқот дар доираи «Стратегияи сиёсати давлатии ҷавонон то соли 2030» ва «Стратегияи миллии муқовимат ба экстремизм ва терроризм барои солҳои 2021-2025» таҳти унвони «Тарбияи ватандӯстии шаҳрвандон – омили таҳкими пояҳои давлатдории миллӣ» доир шуд.

Дар интиҳои мулоқот як зумра кормандони сохторҳо, аз ҷумла роҳбарияти Кумитаи телевизион ва радиои ҷумҳурӣ барои саҳми арзанда дар тарғиби сиёсати давлатии ҷавонон тавассути шабакаҳои телевизионӣ ва радиоӣ бо Сипосномаи Кумитаи кор бо ҷавонон ва варзиши назди Ҳукумати  Ҷумҳурии Тоҷикистон қадрдонӣ шуданд.

 АКС: Кумитаи телевизион ва радиои назди Ҳукумати Ҷумҳурии Тоҷикистон

Декабрь 3, 2023 15:10

Хабарҳои дигари ин бахш

Дар Хоруғ озмуни «Расми беҳтарин дар мавзуи бехатарӣ аз сӯхтор» баргузор гардид
Имрӯз дар Тоҷикистон ҳавои тағйирёбанда шуда, борону барф меборад
Дар Ҷамоати деҳоти Қаратоғи шаҳри Турсунзода оид ба риояи қонунҳои миллӣ вохӯрӣ доир шуд
Имсол азхудкунии 3410 гектар заминҳои нави обёришаванда ба нақша гирифта шудааст
Ҷаласаи нахустини Раёсати Муассисаи давлатии «Комиссияи олии аттестатсионии назди Президенти Ҷумҳурии Тоҷикистон» доир гардид
СОҲИБ ТАБАРОВ – МУНАҚҚИДИ ВОҚЕЪБИНУ СОҲИБМАКТАБ. Андешаҳои профессор Аламхон Кӯчарзода бахшида ба 100-солагии ин адабиётшиноси маъруфи тоҷик
Имрӯз дар бештари манотиқи Тоҷикистон пастшавии ҳарорати ҳаво пешгӯӣ мешавад
Ба Ҷоизаи сулҳи Нобел дар соли 2024 285 номзад пешниҳод гардид
Имрӯз дар Душанбе сардии ҳаво ба 2 дараҷа мерасад
Байни донишҷӯдухтарони Донишгоҳи давлатии ҳуқуқ, бизнес ва сиёсати Тоҷикистон мусобиқаҳои варзишӣ оғоз ёфтанд
Сӯхтори ҷангал дар Техас дар таърихи мушоҳидаҳои иёлат дуюмин бузургтарин гардид
Созмони Милали Муттаҳид барои кумак ба Эфиопияи шимолӣ, ки аз хушксолӣ зарар дидааст, 17 миллион доллари ИМА ҷудо намуд