Вакили Маҷлиси намояндагони Маҷлиси Олии Ҷумҳурии Тоҷикистон дар конфронси байналмилалии илмӣ-амалӣ дар Ашқобод иштирок намуд

ДУШАНБЕ, 27.12.2023 /АМИТ «Ховар»/. Имрӯз вакили Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ дар кори  конфронси байналмилалии илмӣ-амалӣ дар мавзуи  «Ҷавонони хушбахт бо Аркадаг Сердар» дар шаҳри Ашқободи Туркманистон иштирок ва суханронӣ намуд.  Дар ин хусус АМИТ «Ховар» бо истинод ба Маҷлиси намояндагон хабар медиҳад.

Дар ҳамоиш намояндагони Тоҷикистон, Узбекистон, Қазоқистон, Озарбойҷон, Русия, Италия, Чин, Туркия, Фаронса, созмонҳои байналмилалӣ – Созмони Амният ва Ҳамкорӣ дар Аврупо (САҲА) ва Созмони ҳамкории исломӣ,  инчунин Ассотсиатсияи байналмилалии кураш ва Федератсияи байналмилалии шоҳмот иштирок намуданд.

Мавсума Муинӣ иброз намуд, ки Ҷумҳурии Тоҷикистон муносибатҳои дӯстӣ ва ҳамкории таърихӣ бо Туркманистонро, ки ба эътимод ва ҳамдигарфаҳмӣ асос ёфтаанд, хеле қадр менамояд.

«Давоми зиёда аз сӣ соли истиқлолият давлатҳои мо дар ҳамкории созандаи байнидавлатӣ ва байнипарлумонӣ таҷрибаи ғанӣ ҷамъ намудаанд.  Ин сатҳи равобити Тоҷикистон ва Туркманистон, албатта, пеш аз ҳама, хизматҳои Пешвои миллати мо муҳтарам Эмомалӣ Раҳмон ва Пешвои миллии халқи туркман муҳтарам Қурбонгулӣ Бердимуҳаммадов мебошанд»,-афзуд ӯ.

Тазаккур дода шуд, ки дар тамоми ҷаҳон ҷавонон ҳамчун неруи созанда ва навовар эътироф шудаанд. Таъмини таҳкими иқтидори сиёсӣ, иқтисодӣ ва иҷтимоии ҳар давлатро бе иштироки фаъолонаи ҷавонон тасаввур намудан ғайриимкон аст.   Бешубҳа, афзалияти стратегии сарнавишти ҷавонон барои давлат ва ҷомеа истифодаи самаранок ва рушди ғояҳои пешқадам ва пеш аз ҳама, неруи инноватсионие, ки ҷавонон муҳаррики асосии он ҳастанд, мебошанд.

Воқеан, давлат ҷавононро як қишри асосии ҷомеаи ояндасоз эътироф намуда, дар назди худ вазифа гузоштааст, ки барои он шароит фароҳам оварад ва ақлу малакаи зеҳнии онҳоро ба пешрафти тамоми соҳаҳо ҷалб созад.

Таърихи Тоҷикистони соҳибистиқлол нишон медиҳад, ки имрӯз ҷавонони тоҷик ҳамчун неруи бузурги созанда эътироф шудаанд. Аз ин рӯ, Ҳукумати Ҷумҳурии Тоҷикистон ҳалли мушкилоту масъалаҳои ҳаёти наврасону ҷавононро самти афзалиятноки сиёсати иҷтимоии давлат эълон намудааст. Гузашта аз ин, таъмини иштироки ҷавонон дар ҳаёти сиёсиву иҷтимоии ҷомеа ва идораи давлатӣ, аз ҷумла тавассути дастгирии фаъолияти иттиҳодияҳои ҷамъиятии онҳо яке аз самтҳои афзалиятноки сиёсати давлатии ҷавонони Тоҷикистон мебошад.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи баланд бардоштани сифати таълиму тарбия, соҳиб шудан ба ихтисос, касбу ҳунар, шуғли аҳолӣ,  мавқеи махсуси ҷавонон дар ҷамъият таваҷҷуҳи хосса зоҳир менамоянд.

Имрӯзҳо ҷавонони тоҷик дар симпозиуму конференсияҳо, форумҳо, олимпиадаҳо, мусобиқаҳои фарҳангӣ ва варзишӣ давлати соҳибистиқлоли моро бо ифтихори бузург муаррифӣ менамоянд.

АКС: Маҷлиси намояндагони Маҷлиси Олии Ҷумҳурии Тоҷикистон