Бонки миллии Тоҷикистон узви Network for Greening the Financial System гардид

ДУШАНБЕ, 20.01.2024 /АМИТ «Ховар»/. Бонки миллии Тоҷикистон узви Шабакаи сабзгардонии низоми молиявӣ — Network for Greening the Financial System /NGFS/ гардид. Тасдиқномаи Шабакаи сабзгардонии низоми молиявӣ дар хусуси пайваст шудани Бонки миллии Тоҷикистон дастрас гардидааст, иттилоъ медиҳад АМИТ «Ховар» бо истинод ба Бонки миллии Тоҷикистон.

Бояд тазаккур дод, ки Бонки Аврупоии Таҷдид ва Рушд (БАТР) аз соли 2018 ба ҳайси нозири NGFS аллакай мақоми танзимкунанда ва ниҳодҳои назоратӣ дар минтақаи Осиёи Марказӣ, аз ҷумла, Арманистон, Гурҷистон ва Узбекистонро барои узвият ба NGFS дастгирӣ намудааст.

NGFS шабакаи гурўҳи бонкҳои марказӣ ва мақоми назоратии пруденсиалӣ мебошад, ки дар доираи фаъолияти он давлатҳои аъзо дар самти табодули таҷрибаи пешқадам, саҳмгузорӣ дар рушди идоракунии хавфҳои муҳити зист ва иқлим дар бахши молиявӣ ва ҷалби маблағҳо барои дастгирии раванди гузариш ба иқтисоди устувор ҳамкорӣ менамоянд.

121 бонкҳои марказӣ, аз ҷумла бонкҳои марказии Амрико, Британияи Кабир, Иттиҳоди Аврупо, Ҷопон, Чин, Гурҷистон ва Узбекистон аъзои шабакаи NGFS мазкур буда, дар доираи он табодули таҷриба байни давлатҳои аъзо амалӣ мегардад.

Ҳадафи шабакаи мазкур муайянсозӣ, пешбурд ва саҳмгузорӣ дар рушди таҷрибаҳои беҳтарин дар дохил ва берун аз узвият дар NGFS, ҳамчунин, гузаронидани корҳои таҳлилӣ оид ба маблағгузории сабз мебошад. Инчунин, иқдоми мазкур ҷиҳати ноил шудан ба ҳадафҳои «Стратегияи рушди иқтисоди сабз барои солҳои 2023-2027» ва суръат бахшидан ба раванди татбиқи Созишномаи Париж оид ба тағйирёбии иқлим (2016) мусоидат хоҳад намуд.

Интизор меравад, ки шомилшавӣ ба NGFS огоҳии иштирокдорони бозори молиявиро вобаста ба масъалаҳои иқлимӣ баланд бардошта, ба маблағгузории устувор ва «сабз» дар Тоҷикистон суръат мебахшад.

АКС:Бонки миллии Тоҷикистон