«ИСТИҚЛОЛ ВА РУШДИ ЗАБОНИ МОДАРӢ». Бахшида ба Рӯзи байналмилалии забони модарӣ дар Душанбе ҳамоиш доир шуд

Февраль 20, 2024 16:55

ДУШАНБЕ, 20.02.2023. /АМИТ «Ховар»/. Бахшида ба Рӯзи байналмилалии забони модарӣ, ки ҳамасола 21 феврал дар бисёре аз давлатҳои дунё бо ҳамоишу барномаҳои гуногун гузаронида мешавад, дар Кумитаи забон ва истилоҳоти назди Ҳукумати Ҷумҳурии Тоҷикистон дар мавзуи «Истиқлол ва рушди забони модарӣ» конференсияи илмӣ-амалӣ баргузор гардид, хабар медиҳад АМИТ «Ховар».

Дар оғози ҳамоиш таъкид гардид, ки мувофиқи қарори иҷлосияи 30-юми Конференсияи генералии ЮНЕСКО 21 феврал Рӯзи байналмилалии забони модарӣ эътироф шудааст.

Ҳадаф аз он ҷалби таваҷҷуҳи оламиён ба гуногунрангии забонҳо ва рушду инкишофи онҳо буда, ҳамзамон барои таҳаммулпазирӣ ва ҳамдигарфаҳмию муколама ба наздикшавию ҳамкории мутақобилаи миллатҳои гуногун мусоидат менамояд.

Раиси Кумитаи забон ва истилоҳоти ҷумҳурӣ Олимҷон Муҳаммадҷонзода иброз дошт, ки забони ҳар миллат яке аз муҳимтарин унсурҳои ҳувият, рамзи истиқлоли маънавӣ ва аз муҳимтарин рукнҳои истиқлоли сиёсии он мебошад. Яке аз шартҳои мавҷудияти ин ё он қавму миллатро забони давлатӣ муайян менамояд. Далели барҷастаи ин андеша дар аксари мавридҳо ҳамсон будани унвони забон бо номи миллат ва қавмият ва дар ниҳоят давлат аст.

«Дар Ҷумҳурии Тоҷикистон забони тоҷикӣ ба ҳайси забони давлатӣ эътироф гардида, коргузорӣ ва муносибатҳои мухталиф бо ҳамин забон амалӣ мегарданд. Дар арсаи байналмилалӣ низ давлатҳоро бо забонашон мешиносанд ва ҳамкорӣ менамоянд», -иброз дошт ӯ.

Таъкид шуд, ки забони тоҷикӣ дар байни забонҳои зиндаи ҷаҳон яке аз бойтарин ва ғанитарин ба шумор меравад. Ҳамин аст, ки донишмандон ва муҳаққиқони хориҷӣ адабиёти тоҷикро яке аз бузургтарин адабиёти башарият номидаанд. Имрӯз, ҳазору сад сол пас аз вафоти Рӯдакӣ, аксари мардуми тоҷикзабон метавонанд ашъори ӯро хонанд ва дарк намоянд.

Иброз шуд, ки мероси адабиёти тоҷик аз ҷиҳати миқдор ҳам хеле назаррас ва маълум аст, ба монанди «Шоҳнома»-и Фирдавсӣ, ки шаст ҳазор байт, ашъори Аттор беш аз сад ҳазор байт, «Маснавии маънавӣ» ва лирикаи Ҷалолуддини Балхӣ беш аз шаст ҳазор байтро ташкил медиҳанд.

Иштирокдорони конференсия ҷиҳати татбиқи босамари забони давлатӣ ибрози андеша намуда, дар зимн баҳри равнақи он тавсияҳои муҳим пешниҳод намуданд.

Дар ҷараёни ҳамоиш аз ҷониби мутахассисони бахшҳои гуногуни забон зиёда аз 20 маърузаи илмӣ баррасӣ гардид.

Ҳамзамон дар конференсия нашри сеюми китоби забоншинос Рустам Ваҳҳобзода — «Дуруст бинависем» рӯнамоӣ шуд. Ин китоб дар рушду густариши забони адабии меъёри тоҷикӣ бо истифодаи вожаю ибораҳои мантиқан дуруст муҳим арзёбӣ гардид.

Зарангези ЛАТИФ,
АМИТ «Ховар»

АКС: АМИТ «Ховар»

Февраль 20, 2024 16:55

Хабарҳои дигари ин бахш

Суратгузориш аз баргузории Рӯзҳои фарҳанги Ҷумҳурии Тоҷикистон дар Ҷумҳурии Озарбойҷон
«МАСЪАЛАҲОИ ФАРҲАНГИ МУОСИРИ БАДЕИИ ТОҶИК». Таҳти чунин ба бузургдошти хотираи санъатшиноси тоҷик Саъдулло Раҳимов ҳамоиш доир шуд
Экспедитсияи бостоншиносӣ-геологӣ доир ба омӯзиши бошишгоҳҳои асри санги ноҳияи Ховалинг шуруъ гардид
Рӯзҳои синамои Тоҷикистон дар Озарбойҷон доир шуд
Рӯзҳои фарҳанги Тоҷикистон дар Озарбойҷон бо шаҳомати хосса баргузор гардид
Дар Озарбойҷон Рӯзҳои синамои Тоҷикистон доир гардид
ҶОЙГОҲИ ХОССАИ ҶАВОНОНИ ТОҶИКИСТОН. Сиёсати давлатии ҷавонон дар замони истиқлоли давлатӣ густариши бештар ёфтааст
Дар Душанбе масъалаи истифодаи технологияҳои муосир баррасӣ гардид
Дар Боку густариши робитаҳои фарҳангии Тоҷикистон ва Озарбойҷон мавриди баррасӣ қарор гирифт
Намоишгоҳи маҳсулоти ҳунарҳои мардумӣ, либосҳои миллӣ ва санъати тасвирию ороишии Тоҷикистон дар Озарбойҷон баргузор гардид
«ҶАВОНОН- ПАЙРАВОНИ ПЕШВОИ МИЛЛАТ». Дар Душанбе таҳти чунин унвон роҳпаймоии осоишта доир шуд
Намояндаи Тоҷикистон дар Португалия дар ҳамоиш оид ба мудирият ва устуворӣ дар фаъолияти кайҳон иштирок намуд