Дар Тошканд Форуми ректорони донишгоҳҳои Тоҷикистон ва Узбекистон гузаронида мешавад

ДУШАНБЕ, 19.03.2024 /АМИТ «Ховар»/. Моҳи апрел дар Тошканд Форуми ректорони донишгоҳҳои Тоҷикистон ва Узбекистон  гузаронида мешавад. Масъалаи ҳолати кунунӣ, роҳҳои тақвияти ҳамкорӣ дар соҳаи маориф, илм ва инноватсия байни Тоҷикистон ва Узбекистон дар мулоқоти  Сафири Фавқулода ва Мухтори Ҷумҳурии Тоҷикистон дар Ҷумҳурии Узбекистон Абдуҷаббор Раҳмонзода бо вазири таҳсилоти олӣ ва инноватсияи Ҷумҳурии Узбекистон Қунғуротбой  Шарипов дар Тошканд баррасӣ гардид.

АМИТ «Ховар» бо истинод ба Сафорати Ҷумҳурии Тоҷикистон  дар Ҷумҳурии Узбекистон иттилоъ медиҳад, ки дар мулоқот ҳамзамон масоили марбут ба  мубодилаи омӯзгорон ва донишҷӯён, доир намудани конфронсҳои илмӣ, иштирок дар кори шуроҳо оид ба ҳимояи диссертатсияҳо, ташкили равандҳои омӯзиши мутақобила, баланд бардоштани ихтисоси омӯзгорон, ҷорӣ намудани технологияҳои рақамӣ дар соҳаи маориф муҳокима шуданд.

Ҳамзамон ҷонибҳо масъалаҳои баргузории намоишгоҳи таълимии донишгоҳҳои Узбекистон дар Тоҷикистонро ҳамоҳанг намуданд.

АКС: Сафорати Ҷумҳурии Тоҷикистон  дар Ҷумҳурии Узбекистон