Дар Файзобод наваскаронро бо тантана ба сафи Артиши миллӣ гусел намуданд

Апрель 3, 2024 10:44

ФАЙЗОБОД, 03.04.2024 /АМИТ «Ховар»/. Дар ноҳияи Файзобод чорабинии Рӯзи даъватшаванда ба таври тантанавӣ баргузор гардид. Зимни он 80 ҷавони синни даъватӣ бо дуои неки падару модарон ба сафи Қувваҳои Мусаллаҳи Ҷумҳурии Тоҷикистон ҳамроҳ гардиданд. Дар ин хусус масъулини Мақомоти иҷроияи ҳокимияти давлатии ноҳияи Файзобод ба хабарнигори минтақавии АМИТ «Ховар» Субҳониддини Маҳмуд иттилоъ доданд.

Иброз гардид, ки хизмат ба Ватан-Модар бояд барои ҳар ҷавон ифтихору шараф бошад. Ватанро мисли модари хеш дӯст доштан ва мисли гавҳараки чашм эҳтиёт намудан қарзи ҳар фарзанди миллат аст. Хизмат дар сафи Артиши миллӣ барои ҷавонон мактаби ҳаёт ва ҷасорати мардонагӣ мебошад. Хушбахтона, бо талошҳои пайвастаи Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон барои фаъолияти рӯзмарраи хизматчиён дар қисмҳои ҳарбӣ шароити зарурии маишиву моддӣ муҳайё шуда, дар ҳамаи воҳидҳои низомӣ имрӯз афсарони касбии ботаҷриба баҳри баланд бардоштани малакаи ҳарбиву ҷисмонии ҷавонон, тарбияи онҳо дар руҳияи ватандӯстӣ ва садоқат ба марзу бум фаъолияти босамар менамоянд.

Зулайхо Боева- модари аскари навдаъват Афзалшои Раҷабмурод аз деҳаи Сари чашмаи Ҷамоати деҳоти Ҷавонон иброз намуд, ки «солҳои охир зиёд гардидани шумораи ҷавононе, ки ихтиёрӣ ба сафи Қувваҳои Мусаллаҳ мепайванданд, шоистаи таҳсин аст. Мо, модарони ноҳияи Файзобод фарзандонамонро дар руҳияи ватандӯстӣ тарбия менамоем, то бо камоли ифтихор ва нангу номуси ватандӯстӣ ба сафи Артиши миллӣ ҳамроҳ гарданд. Ман ду писар дорам ва фарзанди калонии ман Хусрави Раҷабмурод имрӯзҳо дар яке аз қисмҳои низомии ҷумҳурӣ ҳамчун мутахассис-ронанда адои хизмат менамояд. Дар қисмҳои низомии мамлакат беҳтарин шароит муҳайё гардидааст ва фарзандони мо хуб обу тоб ёфта, ба Ватани азиз хизмат менамоянд. Аз сабаби он ки фарзанди калонии ман мутахассиси хуби мошинҳои калон мебошад, дар қисми низомӣ соҳиби эҳтиром аст. Аз ин рӯ мо, модарон бояд фарзандонамонро соҳиби касб намоем, то дар ҷомеа ҷойгоҳашонро пайдо намоянд. Ман имрӯз дар ин маърака писари хурдиям Афзалшои Раҷабмуродро ба Сафи артиши миллӣ гусел дорам. Ман боварӣ дорам, ки фарзанди ман дар беҳтарин шароит хизмати Ватан-Модарро адо намуда, сарбаландона ба деҳаамон боз мегардад. Мо, модарон бояд фарзандонамонро дар руҳияи ватандӯстӣ, покдилӣ, садоқат ба Ватан, ҳифзи марзу бум, номус ва обрӯи давлату миллат тарбия намоем. Сарбаландона хизмат намудан ба Ватан барои ҷавонписарони тоҷик қарз ва шараф аст».

Хурсандиовар аст, ки имсол аз ҳисоби Мақомоти иҷроияи ҳокимияти давлатии ноҳияи Файзобод ва Вазорати мудофиаи Тоҷикистон 62 ҷавони синни даъватӣ даври омӯзишии ронандагии ТҶММ «Мададгори мудофиа» – ро хатм намуда, ҳамчун мутахассис ба сафи Артиши миллӣ ҷалб гардиданд.

Дар анҷоми ҳамоиш маросими кулчагазон ва барномаи консертии ҳунармандон доир гардид.

АКС: Мақомоти иҷроияи ҳокимияти давлатии ноҳияи Файзобод

Апрель 3, 2024 10:44

Хабарҳои дигари ин бахш

Нақшаи даъвати шаҳрвандон ба хизмати ҳатмии ҳарбӣ иҷро шуд. Фаъолияти комиссияҳои даъватӣ то охири моҳи май идома меёбад
Даъвати ҳарбӣ дар вилояти Суғд ҷамъбаст гардид
Вазирони корҳои дохилии Тоҷикистон ва Озарбойҷон густариши ҳамкории дуҷонибаро баррасӣ намуданд
Дар Тоҷикистон ҳамкорӣ дар самти таъмини амнияти ҳастаӣ густариш меёбад
Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар медиҳад
Дар Остона нахустин вохӯрии котибони шуроҳои амнияти давлатҳои Осиёи Марказӣ баргузор гардид
Дар Душанбе ҷаласаи 5-уми прокурорҳои генералии давлатҳои аъзои Созмони ҳамкории иқтисодӣ баргузор шуд
Даъвати баҳории шаҳрвандон ба сафи Қувваҳои Мусаллаҳи Тоҷикистон то охири моҳи май идома меёбад
Байни Прокуратураи генералии Тоҷикистон ва Прокуратураи генералии Суди Олии аппелятсионии Туркия Ёддошти тафоҳум оид ба ҳамкорӣ ба имзо расид
САВГАНДИ САДОҚАТ БА ВАТАН. Дар ҷузъу томҳои Артиши миллии Тоҷикистон маросими савгандёдкунии наваскарон оғоз шуд
Дар Хатлон нақшаи даъват ба хизмати Ватан бори аввал пеш аз муҳлат пурра иҷро гардид
ДАЪВАТИ БАҲОРӢ: Дар Хатлон ин чорабинии муҳими сиёсӣ дар марҳилаи анҷомёбӣ қарор дорад