Мубориза бо зуҳуроти номатлуб ва риояи қонуни миллӣ дар вохӯрии намояндагони Кумитаи дин бо гумрукчиёни мамлакат баррасӣ гардид

ДУШАНБЕ, 04.04.2024 /АМИТ «Ховар»/. Терроризм ва ифротгароӣ яке аз зуҳуроти номатлуб дар замони мусоир ба шумор меравад, зеро он боиси оқибатҳои нохуш — таҳдид ё истифодаи зӯроварӣ, расонидани зарари вазнин, бенизомӣ, тағйири сохти конститутсионӣ, ғасби ҳокимият ва аз они худ намудани ваколатҳои он, барангехтани низои миллӣ, иҷтимоӣ ва динӣ мебошад. Чунин гуфта шуд дар вохӯрие, ки  дар  Хадамоти гумрук бо иштироки намояндагони Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон бо кормандони мақомоти гумрук доир гардид. Дар ин хусус ба АМИТ «Ховар» дар Хадамоти гумруки назди Ҳукумати Ҷумҳурии Тоҷикистон иттилоъ доданд.

Гуфта шуд, ки терроризм аз нуқтаи назари ҳуқуқӣ- содир намудани амалҳое мебошад, ки ба одамон хатари марг ба миён меоварад, истифодаи он мақсади ҷисмонӣ, бартараф намудани рақибони сиёсӣ, вайрон намудани бехатарии ҷамъиятӣ, тарсонидани аҳолӣ ё расонидани таъсир барои аз тарафи ҳокимият қабул кардани қарорҳо мебошад. Зӯроварӣ, зулм, фишороварӣ, таҳқир ва паст задани шаъну шарафи инсон, хусусан гурӯҳҳои дигари этникӣ аз ҷониби ҷомеа ва давлат мумкин аст эътироз ба вуҷуд оварад, ки он  ба ифротгароӣ мебарад.

Вохӯрӣ дар асоси Нақшаи кори комиссияи ҷамъиятии Хадамоти гумруки назди Ҳукумати Ҷумҳурии Тоҷикистон оид ба танзими анъана ва ҷашну маросим барои соли 2024 гузаронида шуда, дар он кормандони Кумитаи дин ва мақомоти гумрук вобаста ба шарҳу тавзеҳи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва «Консепсияи сиёсати давлатии Ҷумҳурии Тоҷикистон дар соҳаи дин» сухан намуданд. Гуфта шуд, ки қонун ва консепсияи қабулшуда дар самти ба низому тартиб даровардани анъана, маросиму ҷашнҳои милливу динӣ, инчунин дигар суннатҳои мардумӣ нақши бориз гузоштаанд. Бо қабули онҳо пеши роҳи сарфи зиёди маблағ дар баргузории маъракаҳо гирифта шуда, дастгирии молиявӣ ва моддии шахсони камбизоату ниёзманд бештар гардид. Инчунин  пеши роҳи хурофоту таассуб, худнамоиву зоҳирпарастӣ ва исрофкориву зиёдаравӣ низ гирифта шуда, ба ҷорӣ гардидани низому тартиботи ягонаи баргузории чорабиниҳои милливу мардумӣ роҳ кушод.

Дар анҷоми ҷаласа таъкид гардид, ки ҳар кадоми мо бояд талаботи қонунро риоя намуда, ба исрофкориву зиёдаравӣ роҳ надиҳем ва барои баланд бардоштани сатҳи иҷтимоию иқтисодии ҳаёти шаҳрвандонамон саҳм гузорем.

АКС: Хадамоти гумруки назди Ҳукумати Ҷумҳурии Тоҷикистон