Президенти Федератсияи футболи Тоҷикистон Рустами Эмомалӣ барои дастаи мунтахаби мамлакат оид ба футзал 100 ҳазор доллари ИМА ҷудо намуданд

ДУШАНБЕ, 27.04.2024 /АМИТ «Ховар»/. Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Федератсияи футболи Тоҷикистон муҳтарам Рустами Эмомалӣ дастаи мунтахаби мамлакат оид ба футзалро барои роҳ ёфтан ба Ҷоми ҷаҳон-2024 қадрдонӣ намуданд. Дар ин хусус ба АМИТ “Ховар” дар Федератсияи футболи Тоҷикистон хабар доданд.

Дастаи мунтахаби Тоҷикистон оид ба футзал бори нахуст дар таърих ба Ҷоми ҷаҳон, ки имсол дар Узбекистон баргузор мешавад, роҳхат гирифт. Барои ин дастовард Президенти Федератсияи футболи Тоҷикистон муҳтарам Рустами Эмомалӣ барои тими миллии футзали мамлакат ҳамчун мукофотпулӣ 100 ҳазор доллари ИМА ҷудо намуданд.

Ёдовар мешавем, ки дар Ҷоми Осиё-2024 дар Бангкок дастаи мунтахаби Тоҷикистон аллакай панҷ вохӯрӣ анҷом дод. Футзалбозони мамлакат дар марҳилаи гурӯҳии мусобиқа бар тими Кореяи Ҷанубӣ (2:0) пирӯз шуда, инчунин бо дастаҳои Қирғизистон (2:2) ва Ҷопон (1:1) мусовӣ (1:1) карданд. Дар даври чорякниҳоӣ дастаи Тоҷикистон бар тими миллии Афғонистон (2:1) ғолиб шуда, дар даври ниманиҳоӣ аз мизбони Ҷоми Осиё-2024 — дастаи мунтаби Тайиланд (вақти асосӣ – 3:3) дар силсилазарбаҳои пеналти бо ҳисоби 5:6 шикаст хӯрданд.

Дар бозӣ барои ҷойи сеюм дастаи мунтахаби Тоҷикистон рӯзи 28 апрел бо тими миллии Узбекистон вомехӯрад. Ин вохӯрӣ соати 13:00 ба вақти Душанбе оғоз мешавад.

АКС: Федератсияи футболи Тоҷикистон