Раиси вилояти Хатлон дар Ёвон бо ҷараёни таҷдиди канали обрасонии «Лойқасой» шинос шуд

ДУШАНБЕ, 12.04.2024 /АМИТ «Ховар»/. 12 апрел Раиси вилояти Хатлон Давлаталӣ Саид зимни сафари корӣ дар ноҳияи Ёвон бо раванди корҳои таъмиру навсозии канали обрасонии «Лойқасой» шинос шуд. Дар ин хусус АМИТ «Ховар» бо истинод ба хадамоти матбуоти Раиси вилояти Хатлон хабар медиҳад.

Зимни шиносоӣ иттилоъ дода шуд, ки дарозии канал зиёда аз 97 километр буда, 19 400 гектар заминро дар ноҳияҳои Ёвон, Хуросон ва қисман Абдураҳмони Ҷомӣ дар сурати ба анҷом расидани корҳои таъмиру навсозии қубурҳои обгузар бо об таъмин менамояд.

Ҳоло ғунҷоиши об дар ин канал 8 кубро ташкил дода, пас аз амалишавии лоиҳа то 15-20 куб зиёд мешавад.

Зимни суҳбат Раиси вилоят супориш дод, ки барои ба таври сифатнок амалӣ шудани лоиҳа тадбирҳои зарурӣ андешида, канал дар фурсати муайянгардида ба истифода дода шавад.

АКС: Хадамоти матбуоти Раиси вилояти Хатлон