Агентии авиатсияи граждании Тоҷикистон ҳамкориро бо ТРАСЕКА густариш медиҳад

ДУШАНБЕ, 31.05.2024 /АМИТ «Ховар»/. Масъалаҳои марбут ба рушди авиатсияи гражданӣ ва густариши ҳамкории мақомоти марбутаи авиатсионии Тоҷикистон бо Комиссияи байниҳукуматии долони нақлиётии Аврупо – Қафқоз – Осиё (ТРАСЕКА) дар мулоқоти директори Агентии авиатсияи граждании назди Ҳукумати Ҷумҳурии Тоҷикистон Ҳабибулло Назарзода бо котиби генералии Котиботи доимии Комиссияи байниҳукуматии долони нақлиётии Аврупо – Қафқоз – Осиё (ТРАСЕКА) Асет Асавбаев дар Душанбе баррасӣ шуданд. Дар ин хусус АМИТ «Ховар» бо истинод ба Агентии авитсияи граждании назди Ҳукумати Ҷумҳурии Тоҷикистон иттилоъ медиҳад.

Асет Асавбаев доир ба фаъолияти ТРАСЕКА ва ҳамкории он бо давлатҳои Осиёи Марказӣ ибрози назар намуд.

Роҳбарияти Агентии авиатсияи гражданӣ доир ба дурнамои соҳа, хусусан зиёд намудани хатсайрҳои нави ҳавоӣ сухан намуд. Инчунин ҷонибҳо масъалаҳои иштироки мутахассисони Агентии авиатсияи гражданӣ дар даврҳои омӯзишӣ, конфронсҳо ва баланд бардоштани сатҳи касбияти мутахассисону кормандони соҳаи авиатсияи гражданиро баррасӣ намуданд.

АКС: Агентии авиатсияи граждании назди Ҳукумати Ҷумҳурии Тоҷикистон