«Барномаи биллингӣ» шаффофияти пардохти маблағи иҷораи китобҳои дарсиро дар муассисаҳои таҳсилӣ таъмин менамояд

Май 6, 2024 14:38

ДУШАНБЕ, 06.05.2024 /АМИТ «Ховар»/. Зимни нишасти матбуотии охир Вазири маориф ва илми Тоҷикистон Раҳим Саидзода иттилоъ дода буд, ки дар соли нави хониш тамоми муассисаҳои зертобеи вазорат, хусусан муассисаҳои таҳсилоти миёнаи умумӣ пардохти маблағи адабиёти таълимиву бадеӣ ва иҷораи китобҳои дарсиро пурра ба таври ғайринақдӣ ба роҳ мемонанд. Пас аз ҷорӣ шудани ин система волидон метавонанд тавассути телефони мобилӣ пули иҷораи китобҳои дарсиро пардохт намоянд. Дар мавриди иҷрои ин лоиҳа ва натиҷаҳои он директори Маркази таҳия, нашр ва муомилоти китобҳои дарсии Вазорати маориф ва илми Тоҷикистон Рустам Пиракзода ба мухбири АМИТ «Ховар» маълумот дод.

Бино ба гуфтаи мусоҳиб, бо мақсади иҷрои фармони Президенти Ҷумҳурии Тоҷикистон аз 22 июни соли 2023 «Дар бораи тадбирҳои вусъат додани ҳисоббаробаркунии ғайринақдӣ» мақомоти маҳаллии идораи маорифи вилоят, шаҳр ва ноҳияҳо дар ҳамоҳангӣ бо сохторҳои дахлдори маҳаллӣ, роҳбарони муассисаҳои таълимӣ, новобаста аз шакли ташкилию ҳуқуқӣ вазифадор карда шуданд, ки муассисаҳои таълимӣ тамоми хизматрасонии пулакӣ, аз ҷумла пардохти маблағи адабиёти таълимиву бадеӣ ва маблағи иҷораи китобҳои дарсиро ба таври ғайринақдӣ ба роҳ монанд.

«Ҳамзамон вазорат барои назорати системаи иҷораи китобҳои дарсӣ ва маводи таълимӣ, аз ҷумла даромад, хароҷот, пардохти ғайринақдии маблағҳои иҷораи китобҳои дарсӣ ва маводи таълимӣ, «Барномаи биллингӣ» таҳия намудааст.

Қарордоди дуҷонибаро 21 феврали соли 2023 ҳамчун фармоишгар – Вазорати маориф ва илми Ҷумҳурии Тоҷикистон ва паймонкор – Ҷамъияти дорои масъулияти маҳдуди “Фариса” ба имзо расониданд. То саршавии соли хониши нав барнома дар муассисаҳои таҳсилоти умумӣ мавриди истфода қарор дода мешавад”, — хабар дод директори Маркази таҳия, нашр ва муомилоти китобҳои дарсӣ.

Ба гуфтаи Рустам Пиракзода, ин барнома шаффофияти пардохти маблағи иҷораи китобҳои дарсиро дар муассисаҳои таҳсилоти умумӣ таъмин намуда, маблағҳои иҷораи китобҳои дарсӣ ба суратҳисоби махсуси Вазорати маориф ва илми Ҷумҳурии Тоҷикистон дар муҳлатҳои муқарраргардида ворид мегарданд.

“Инчунин ҷорӣ гаштани системаи пардохти ғайринақдӣ хавфҳои эҳтимолии ҳолатҳои коррупсиониро дар муассисаҳои таълимӣ ва маҳалҳо аз байн мебарад ва низоми содашудаи пардохти онлайниро барои волидайни хонандагон осон мегардонад. Масалан, маблағи иҷораи китобҳои дарсиро падару модар метавонанд тариқи ҳамёнҳои мобилӣ дар дилхоҳ вақту соати ба онҳо мувофиқ, новобаста аз ҷою макони истиқоматашон пардохт намояд. Ин система имкон медиҳад, ки берун аз ҷумҳурӣ тариқи низоми биллингии иҷораи китобҳои дарсӣ маблағи онро тариқи ҳисобфактураи пешниҳоднамудаи муассисаи таълимӣ ба таври смс — паёмак пардохт намоянд. Бояд тазаккур дод, ки низоми билингии иҷораи китобҳои дарсӣ пас аз пурра ба истифода додан, новобаста аз мавзеи ҷойгиршавии муассиса, шаҳр, ноҳия ва ё деҳоти дурдасттарин дар шакли ягона бо талаботи якхела амалӣ гардонида мешавад”,-баён дошт корманди вазорат.

Директори Маркази таҳия, нашр ва муомилоти китобҳои дарсии Вазорати маориф ва илми Тоҷикистон иброз намуд, ки «Барномаи биллингӣ» аз ҷониби мутахассисони миллӣ коркард шуда, таҷрибаи низоми биллингии ҷамъияти «Барқи тоҷик» мебошад.

Бояд гуфт, ки ҳисоббаробаркуниҳои ғайринақдӣ пардохтҳое мебошанд, ки бе истифодаи пули нақд бо роҳи истифодаи чек, кортҳои пардохтии бонкӣ ва дигар воситаҳои электронии пардохтӣ, супоришномаҳои пардохтӣ ва ҳоло тавассути пулҳои электронӣ ва ҳамёнҳои электронӣ анҷом дода мешаванд.

Яке аз афзалияти пардохти ғайринақдӣ, хоҳ кортҳои пардохтии бонкӣ ё дигар усулҳои ҳисоббаробаркунӣ тариқи воситаҳои электронии пардохт- ин осон будани истифодаи онҳо аст. Воситаҳои ҳисоббаробаркунии ғайринақдӣ ҳангоми дуруст истифода шудан тарзи нисбатан бехатари пардохти мол ё хизматрасонӣ мебошанд.

Хотиррасон менамоем, ки ба Кодекси ҳуқуқвайронкунии маъмурӣ моддаи 5411 илова гардид, ки тибқи он барои риоя нагардидани талаботи ба тариқи ғайринақдӣ пардохт намудани хизматрасонии давлатӣ ва пардохтҳои дигари ҳатмии давлатӣ ҷавобгарии маъмурӣ муқаррар шудааст.

Лайло ТОИРӢ,
АМИТ «Ховар»

АКС аз манбаъҳои боз

Май 6, 2024 14:38

Хабарҳои дигари ин бахш

КИШТИ ТАКРОРӢ. Барои рӯёнидани ду ё се ҳосил аз як замин чӣ бояд кард?
ТАВСИЯИ МУТАХАССИС. Истеъмоли мармиҷон мӯй ва нохунҳоро мустаҳкам карда, онҳоро қавӣ ва дурахшонтар месозад
МАСЛИҲАТИ МУТАХАССИС. Барои гирифтор нашудан ба бемории дарунравӣ чӣ бояд кард?
Ваҳдати миллӣ ҳамчун рӯзи ҳамгироии миллӣ, иттиҳод ва сулҳу субот дар таърих сабт шудааст
Ҳаққи истифодаи қувваи барқ, об ва хизматрасониҳои коммуналӣ ғайринақдӣ пардохт мегардад
МАСЛИҲАТИ МУТАХАССИС. Истеъмоли помидор фишори хунро муътадил нигоҳ медорад
Байни Донишгоҳи давлатии Бохтар ва Донишгоҳи забонҳои хориҷии Сиани Чин Ёддошти тафоҳум ба имзо расид
Ваҳдати миллӣ – ҳифзи он рисолат ва масъулияти ҳар як фарди ҷомеа мебошад
Ташаббусҳои Пешвои миллат рушди ояндаи мамлакатро муайян мекунад
Ҳамкорӣ байни муассисаҳои таҳсилоти олии Тоҷикистон ва Узбекистон таҳким меёбад
Дар шаҳри Хуҷанд ғолибони олипиадаҳо ва омӯзгорони беҳтарин қадршиносӣ шуданд
БАДАХШОН — ДАРВОЗАИ ТИЛЛОИИ ТОҶИКИСТОН. Дар ин минтақаи кӯҳҳӣ садҳо километр роҳҳои мошингард бунёду навсозӣ гардиданд