Пешвои миллат Эмомалӣ Раҳмон ба ноҳияи Данғараи вилояти Хатлон ташриф оварданд

Май 24, 2024 07:50

ДУШАНБЕ, 24.05.2024 /АМИТ «Ховар»/. 24 май Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо вазъи соҳаҳои иҷтимоию иқтисодӣ, ифтитоҳи як қатор иншооти таъйиноти гуногун дар соҳаи саноату кишоварзӣ, хизматрасонӣ, муассисаҳои нави таълимӣ, оғоз бахшидан ба сохтмони иншооти нави дигар ва мулоқот бо фаъолону сокинон ба ноҳияи Данғараи вилояти Хатлон ташриф оварданд.

Нахуст Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Данғара бинои нави Муассисаи таҳсилоти миёнаи умумии рақами 85-ро дар деҳаи Шаҳбури деҳоти ба номи Исмат Шариф ба истифода доданд.

Бинои нави муассисаи таълимӣ аз дуошёна иборат буда, масоҳати умумии қитъаи замини он наздик ба 1,64 гектарро дар бар мегирад.

Дар қитъаи замини номбурда 1 бинои ду ошёнаи таълимӣ, дегхона, анбори сӯзишворӣ, ҳавзи оташхомушкунӣ ва таҷҳизоти барқтаъминкунӣ ҷойгир шудааст.

Дар маҷмуъ бинои нави муассисаи таълимӣ барои 500 хонанда дар ду баст пешбинӣ шудааст.

Мактаби нав дорои ҳуҷраҳои гуногуни фаннӣ ва компютерӣ мебошад, ки онҳо бо компютер ва таҷҳизоти лабараторӣ барои гузаронидани озмоишҳо таъмин гардидаанд.

Барои баланд бардоштани қобилияти зеҳнии хонандагон муассиса дорои синфхонаҳои шоҳмот, майдончаи варзишии замонавӣ ва китобхона бо 20 ҷойи нишаст мебошад.

Майдончаи варзишии муассиса дорои таҷҳизот барои обу тоби бадан, бозии футбол, волейбол ва баскетбол мебошад.

Дар гузашта хонандагон аз муассисаи таълимӣ танқиси ва барои таҳсил аз деҳоти Шаҳбури деҳоти ба номи Исмат Шариф ба дигар деҳа мерафтанд.

Ҳамасола зиёдшавии шумораи хонандагон дар деҳаи Шаҳбури деҳоти ба номи Исмат Шарифи ноҳияи Данғара ва бештар шудани талабот ба омӯзиши илмҳои замон заруратро барои бунёди чунин як муассисаи таълимӣ тадриҷан дучанд менамуд.

Ҳаминро ба инобат гирифта, соли 2023 бунёди бинои нави муассисаи таҳсилоти миёнаи умумии рақами 85 бо ҷалби сармоя оғоз гардид.

Сарвари давлат муҳтарам Эмомалӣ Раҳмон ба тарҳи бунёди бино баҳои баланд дода, омӯзгоронро барои боз ҳам бештар ба таълиму тарбия фаро гирифтани хонандагон ва дар роҳи худшиносиву ватандӯстӣ ҳидоят намудани онҳо дастуру супоришҳо доданд.

Бинои нави муассисаи таҳсилоти миёнаи умумии рақами 85 бо сохти меъмории замонавӣ бунёд ва дар саҳнаш гулу буттаҳои ороишӣ шинонида шудааст.

Ифтитоҳи бинои нави муассисаи таҳсилоти миёнаи умумии рақами 85 дар деҳаи Шаҳбури деҳоти ба номи Исмат Шарифи ноҳияи Данғара дар доираи омодагиҳо ба ҷашни бузурги миллӣ – 35-солагии Истиқлоли давлатии Ҷумҳурии Тоҷикистон дар идомаи раванди созандагиҳо дар мамлакат сурат гирифта, имкон медиҳад, ки хонандагон дар шароити муосир донишҳои замонавиро азхуд намоянд.

Фароҳам овардани шароит имкон медиҳад, ки ҳавасмандии насли наврас дар доираи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» барои аз худ кардани илмҳои дақиқ бештар шавад.

Пешвои миллат муҳтарам Эмомалӣ Раҳмон мавриди истифода қарор гирифтани бинои нави муассисаи таълимиро дар доираи сиёсати иҷтимоии Ҳукумати мамлакат барои рушди соҳаи маориф муҳим арзёбӣ намуда, насли наврасро омӯзиши илмҳои замонавӣ ҳидоят намуданд.

Май 24, 2024 07:50

Хабарҳои дигари ин бахш

Дар деҳоти Навбаҳори ноҳияи Мастчоҳ кӯдакистон сохта мешавад
Пешвои миллат Эмомалӣ Раҳмон Дабири кулли Созмони ҳамкории иқтисодӣ Асад Маҷид Хонро ба ҳузур пазируфтанд
35-СОЛАГИИ ИСТИҚЛОЛИ ДАВЛАТӢ. Дар шаҳру ноҳияҳои вилояти Хатлон сохтмони иншооти ҷашнӣ идома дорад
35-СОЛАГИИ ИСТИҚЛОЛИ ДАВЛАТӢ. Дар деҳоти Саразми шаҳри Панҷакент варзишгоҳи замонавӣ бунёд мешавад
Идомаи воридшавии барқияҳои табрикии наврӯзӣ ба унвони Президенти Ҷумҳурии Тоҷикистон
Барқияҳои табрикӣ ба унвони Президенти Ҷумҳурии Тоҷикистон Эмомалӣ Раҳмон аз номи як қатор сарони давлатҳо ба муносибати Ҷашни байналмилалии Наврӯз
Тавзеҳот ба фармони Президенти Ҷумҳурии Тоҷикистон «Дар бораи бахшиши ҷазои шахсоне, ки ба маҳрум сохтан аз озодӣ маҳкум шудаанд»
Фармони Президенти Ҷумҳурии Тоҷикистон дар бораи бахшиши ҷазои шахсоне, ки ба маҳрум сохтан аз озодӣ маҳкум карда шудаанд
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ифтихори ҷашни Наврӯзи байналмилалӣ
Сарвари давлат Эмомалӣ Раҳмон дар иҷлосияи якуми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум иштирок намуданд
Қарорҳои Ҳукумати Ҷумҳурии Тоҷикистон
Фармонҳои Президенти Ҷумҳурии Тоҷикистон