Вазири рушди иқтисод ва савдои Тоҷикистон ва Директори Фонди Роҳи Абрешими Чин густариши ҳамкориро баррасӣ намуданд

ДУШАНБЕ, 31.05.2024. /АМИТ «Ховар»/. 29 май вохӯрии Вазири рушди иқтисод ва савдои Тоҷикистон Завқӣ Завқизода бо Директори Фонди Роҳи Абрешими Ҷумҳурии Мардумии Чин Тсай Сиютзюн баргузор шуд, ки дар доираи он масъалаҳои густариши ҳамкорӣ дар самтҳои рушди иқтисод, савдо, саноат, нақлиёт ва кишоварзӣ муҳокима гардиданд. Дар ин хусус ба АМИТ «Ховар» дар Вазорати рушди иқтисод ва савдои ҷумҳурӣ хабар доданд.

Иброз гардид, ки Чин дуюмин шарики тиҷоратии Ҷумҳурии Тоҷикистон ба ҳисоб рафта, дар сармоягузории соҳаҳои иқтисоди миллӣ ҳиссаи назаррас дорад. Соли 2023 гардиши савдои хориҷии Ҷумҳурии Тоҷикистон бо Ҷумҳурии Мардумии Чин 1,5 миллиард долларро ташкил дод, ки нисбат ба соли 2022-юм 24,2 фоиз афзоиш ёфтааст.

Зимни вохӯрӣ Вазири рушди иқтисод ва савдои мамлакат имконияти сармоягузории ҷумҳуриро муаррифӣ карда, дар робита ба ҷудо намудани 26 миллиард юан, ки барои маблағгузории давлатҳои Осиёи Марказӣ аз ҷониби Ҷумҳурии Мардумии Чин равона гардидааст, лоиҳаҳои «Модернизатсияи корхонаи «Алюминийи Тоҷик» (ТАЛКО)», «Сохтмони неругоҳи барқи офтобӣ дар ноҳияи Ашт», «Таъсиси корхонаи нассоҷӣ дар шаҳри Душанбе дар заминаи Ҷамъияти дорои масъулияти маҳдуди «Иттиҳодияи Истеҳсолии Нассоҷии Тоҷик», «Таъсиси маркази логистикӣ дар ноҳияи Данғара», «Сохтмони Парки индустриалӣ-технологии муштарак», «Сохтмони гармхонаҳо дар вилояти Хатлон» ва «Мутобиқ гардонидани қитъаҳои роҳи автомобилгарди Гулистон-Кӯлоб ва Рӯшон-Варшез»-ро, ки қаблан дар мувофиқа бо Ҳукумати Ҷумҳурии Тоҷикистон ба ҷониби Чин ирсол гардидааст, барои баррасӣ пешниҳод намуд, ки хуш пазируфта шуд.

Дар анҷоми вохӯрӣ ҷонибҳо барои густариши ҳамкории мутақобилан судманд изҳори омодагӣ намуданд.

АКС: Вазорати рушди иқтисод ва савдои Ҷумҳурии Тоҷикистон