Дар кӯдакистони «Ситора»-и назди Донишгоҳи давлатии Кӯлоб Рӯзи байналмилалии ҳифзи кӯдаконро ҷашн гирифтанд

КӮЛОБ, 01.06.2024. /АМИТ «Ховар»/. 31 май дар кӯдакистони «Ситора»-и назди Донишгоҳи давлатии Кӯлоб ба номи Абуабдуллоҳи Рӯдакӣ ба хотири таҷлили Рӯзи байналмилалии ҳифзи кӯдакон ҳамоиши фарҳангӣ баргузор гардид, иттилоъ медиҳад мухбири минтақавии АМИТ «Ховар» Сулаймон Холзода.

Дар ҳамоиш таълимгирандагони муассисаро ба муносибати Рӯзи байналмилалии ҳифзи кӯдакон табрик гуфта, чорабиниро бо ин иқтибос аз суханрониҳои Пешвои миллат муҳтарам Эмомалӣ Раҳмон оғоз бахшиданд: «Барои давлат миллати солим ва мардуми солим зарур аст. Кӯдакон ояндаи ҷомеа мебошанд, таъмини ҳуқуқҳои онҳо, ҳифзи саломатӣ, рушди солимию ҷисмонӣ ва равонии онҳо вазифаи аввалиндараҷаи ҳар давлату ҷомеа ба ҳисоб меравад. Дар баробари дигар ҳуқуқҳои дар қонун нисбат ба кӯдакон муқарраршуда яке аз он ҳуқуқи кӯдак ба ҳифзи саломатӣ мебошад».

Иброз гардид, ки Рӯзи кӯдакон на танҳо ҷашни фароғатӣ барои худи кӯдакон аст, балки он инчунин ба ҷомеа дар бораи зарурати ҳимояи ҳуқуқи кӯдак ёдрас мекунад, то ҳамаи кӯдакон хушбахтона ба воя расанд, омӯзанд, то дар оянда шаҳрвандони сазовори давлати худ шаванд.

Сипас, аз ҷониби тарбиятгирандагони кӯдакистон барномаи ҷолиби консертӣ, аз қабили рақсу бозиҳои диловез, суруду таронаҳои бачагона пешниҳод гардид.

Дар охир ба тарбиятгирандагони кӯдакистон, ки аз соли нави таҳсил ба муассисаҳои миёна барои таҳсил фаро гирифта мешаванд, ифтихорномаю туҳфаҳои роҳбарияти кӯдакистон тақдим карда шуд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ