Мавсума Муинӣ: «Ташаббусҳои ҷаҳониии Президенти Тоҷикистон оид ба масъалаҳои обу иқлим ҳамовозии бештар пайдо менамоянд»

Июнь 10, 2024 20:42

ДУШАНБЕ, 10.06.2024. /АМИТ «Ховар»/. Форуми имрӯза тавсеаи ҳамкорӣ барои истифодаи оқилонаи об бо назардошти пешоҳангии ҷониби Тоҷикистон, бахусус ташаббуси ҷаҳониии Президенти Ҷумҳурии Тоҷикистон муҳтарам Эмомалӣ Раҳмон оид ба масъалаҳои обу иқлим ва татбиқи самараноки сисолаи амали барномаи байналмилалӣ оид ба аҳолӣ ва рушд, ки бо сарпарастии Созмони Милали Муттаҳид қабул шудааст, ба шумор меравад. Ҳушҳолем, ки ташаббусҳои ҷаҳониии Президенти Тоҷикистон оид ба масъалаҳои обу иқлим ҳамовозии бештар пайдо намуда, пешсафии мамлакати мо дар ин самт бештар эътирофи ҷаҳониён мегардад. Чунин изҳори назар намуд муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ дар Форуми байналмилалии парлумонии «Захираҳои об ва устувории демографӣ ба манфиати ҷавонон», ки имрӯз дар Китобхонаи миллии Тоҷикистон баргузор гардид, иттилоъ медиҳад АМИТ «Ховар».

Мавсума Муинӣ таъкид намуд, ки ҳадафи форум, қабл аз ҳама, муттаҳид сохтани талошҳои ҷонибҳо барои муваффақ ва натиҷабахш гардонидани мавзуи мавриди назар мебошад.

Номбурда афзуд, ки дар асоси рӯзномаи конфронс оид ба аҳолӣ ва рушд мо бояд раванди ба ҳам овардани тамоми захираҳо ва кӯшишҳои заруриро барои ноил шудан ба ҳадафҳои умумии дар барномаи амал муайяншуда роҷеъ ба мушкилоти демографӣ, тағйирёбии иқлим, амнияти об ва озуқа ва инчунин тавсеаи дастрасӣ ба энергияи барқароршаванда равон намоем.

“Мо, ки дар остонаи 30-солагии барномаи амали Конфронси байналмилалӣ оид ба аҳолӣ ва рушд қарор дорем, метавонем онро ҳамчун ҳуҷҷати заминагузор ва воқеан муҳим дар таърихи ҳуқуқи башар барои ҳамкории бисёрҷониба дар тамоми доираи масъалаҳои аҳолӣ, ноил шудан ба рушди аҳолӣ, баланд бардоштани сатҳи некуаҳволӣ, дастрасӣ ба оби ошомиданӣ, тандурустӣ, маориф ва муҳити зист унвон намоем”,- илова кард мавсуф.

Мавсума Муинӣ изҳори итминон намуд, ки муколама ва мубоҳисаҳои судманд дар доираи ин чорабиниҳо ба таҳияи Харитаи роҳ барои солҳои оянда мусоидат намуда, барои таҳияи уҳдадорииҳои муштараки ҷониибҳо баҳри сабти он дар рӯзномаи ҳамоиши оянда ҳамчун саҳми муносиби мо хизмат менамояд.

Ёдовар мешавем, ки форум бо мақсади татбиқи ташаббусҳои ҷаҳонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва нақши фаъол доштан дар ҳалли мушкилоти вобаста ба об дар сатҳи парлумонҳои ҷаҳонӣ, алалхусус минтақаи Осиё ва Уқёнуси Ором аз ҷониби Маҷлиси намояндагони Маҷлиси Олии Ҷумҳурии Тоҷикистон дар ҳошияи Конфронси сеюми байналмилалии сатҳи баланд оид ба «Даҳсолаи байналмилалии об барои рушди устувор, солҳои 2018-2028» амалӣ гардид.

Дар он вакилони Маҷлиси намояндагони Маҷлиси Олии Ҷумҳурии Тоҷикистон, намояндагони воломақоми давлатҳои аъзои Форуми парлумонҳои Осиё оид ба нуфуси аҳолӣ ва рушд (AFPPD), Ассотсиатсияи аҳолӣ ва рушди Осиё (APDA) ва Хазинаи нуфуси Созмони Милали Муттаҳид (UNFPA), намояндагони Ҳукумати Ҷумҳурии Тоҷикистон, вазорату идораҳо, корпуси дипломатии муқими Душанбе, ташкилоти байналмилалӣ, ҷавонони ташаббускор, муассисаҳои таҳсилоти олии касбӣ ва воситаҳои ахбори иштирок доранд.

Дар форум вакилони парлумонҳои беш аз 20 кишвари ҷаҳон, аз ҷумла Ҷопон, Туркия, Қазоқистон, Туркманистон, Узбекистон, Покистон, Беларус, Озарбойҷон, Гурҷистон, Малайзия, Арманистон, Австрия, Босния ва Герсеговина, Молдова, Непал, Руминия ва намояндагони минтақавию кишварии ниҳодҳои байналмилалӣ иштирок доранд.

Зарангези ЛАТИФ,
АМИТ «Ховар»

АКС: АМИТ «Ховар»

Июнь 10, 2024 20:42

Хабарҳои дигари ин бахш

ТОҶИКИСТОН — ШВЕЙТСАРИЯИ ДУЮМ. Меҳмонон ва иштирокдорони Конфронси оби Душанбе аз тамошои манзараҳои дилфиреби Варзоб, хусусан оби мусаффои дарёи Сиёма ангушти ҳайрат газиданд
ИҚТИСОДИ «САБЗ». Намояндаи Ироқ Ҳотам Ҳусейн: «Шумораи зиёди электромобилҳо дар Душанбе аз тадбирҳои тоза нигоҳ доштани муҳити зист дарак медиҳад»
Президенти Гурӯҳи Бонки исломии рушд Муҳаммад Сулаймон Ал-Ҷассер бо НБО-и «Норак» шинос шуд
Байни вазоратҳои корҳои хориҷии Тоҷикистон ва Ангола Барномаи ҳамкорӣ ба имзо расид
«ТОҶИКИСТОНРО ЧУН БИҲИШТИ РӮИ ЗАМИН ДАРЁФТЕМ». Бардошти меҳмонон пас аз шиносоӣ бо сохтмони Неругоҳи барқи обии «Роғун»
Дар Донишгоҳи байналмилалии забонҳои хориҷии Тоҷикистон оид ба «Истифодаи оқилонаи захираҳои об дар шароити тағйирёбии иқлим» ҳамоиш баргузор шуд
Президенти Бонки исломии рушд бо унвони «Профессори фахрӣ»-и Донишгоҳи байналмилалии сайёҳӣ ва соҳибкории Тоҷикистон сарфароз гардид
Дар Душанбе оид ба ҳаракати аҳолӣ дар заминаи тағйирёбии иқлим дар минтақаҳои кӯҳӣ ҳамоиш доир шуд
Таҳкими дурнамои ҳамкорӣ байни Маркази тадқиқоти стратегӣ ва Машварати ҳамкорӣ ва тадбирҳои боварӣ дар Осиё баррасӣ шуд
РАВАНДИ ОБИ ДУШАНБЕ. Иштирокдорони Конфронси сеюми байналмилалии сатҳи баланд бо фаъолияти Неругоҳи барқи обии «Норак» шинос шуданд
Дар Душанбе ҳамкорӣ дар самти баланд бардоштани иқтидори рушди бозори қоғазҳои қиматноки давлатӣ баррасӣ шуд
РАВАНДИ ОБИ ДУШАНБЕ. Қалъаи Ҳисор бо таърихи 3000-солааш меҳмонони Конфронси байналмилалии сатҳи баланди Душанберо ба ваҷд овард