Намояндаи Ҷумҳурии Беларус Ирина Костевич: «Тоҷикистон пешоҳанги ҳалли масъалаҳои обу иқлим буда, дорои иқтидори бузурги рушд аст»

ДУШАНБЕ, 12.06.2024. /АМИТ «Ховар»/. «Конфронси сеюми байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028» дар мамлакати офтобӣ, зебову гулпӯше баргузор мешавад, ки дорои иқтидори бузурги рушд аст. Тоҷикистон имрӯз дар чаҳорчӯби ин рӯзнома корҳоеро анҷом додааст, ки барои ҷомеаи ҷаҳонӣ бениҳоят арзишманд мебошанд. Яъне пешоҳанги ҳалли масъалаҳои обу иқлим дар ҷаҳон аст», — гуфт Раиси комиссияи доимии Палатаи намояндагони Маҷлиси Олии Ҷумҳурии Беларус оид ба масъалаҳои меҳнат ва иҷтимоӣ Ирина Костевич дар суҳбат бо хабарнигори АМИТ «Ховар».

Ба гуфтаи Ирина Костевич, ин ҷаласаи сатҳи баланд намояндагони давлатҳо ва бонкҳои байналмилалии рушдро ба ҷалби уҳдадориҳои сатҳи баланди сиёсӣ ва молиявӣ барои амалиёти об ҳамчун амали иқлимӣ ҷамъ овардааст. Ин рӯйдоди муҳиме аст, ки кори 30-соларо тасдиқ мекунад. Аз ҷумла, дар ин маъракаи муҳим коршиносони зиёд аз Осиёи Марказӣ ва Аврупои Шарқӣ ҷамъ омадаанд, ки ҳадаф- сабақ гирифтан аз таҷрибаи якдигар дар масъалаи ҳалли мушкилоти обу иқлим мебошад.

Баргузории ин конфронс дар шаҳри Душнбе нишони он аст, ки Тоҷикистон дар ин самт нақши барҷаста дошта, ҷомеаи ҷаҳониро ҳушдор медиҳад, ки дар устувории об ва мутобиқшавӣ ба иқлим масъулияти муштарак эҳсос намоянд. Зеро дар ин ҳамоиш боз ҳам даъват карда мешавад, ки ҳамкории байналмилалӣ, интиқоли технология ва дастгирии молиявӣ афзоиш ёбад, то ҳар давлат, новобаста аз мушкилоти ҷуғрофӣ дорои абзор барои бунёди ҷомеаҳои тобовар ба тағйирёбии об ва иқлим бошад.

Дар доираи ин барнома мо дар бораи кӯдакону ҷавонон ҳарф задем, зеро ояндаи рушди мо аз онҳо вобаста аст. Ҳамзамон дар хусуси занон сухан гуфтем, ки рушди давлат аз ҷиҳати амнияти демографӣ аз онҳо вобаста аст. Зеро тибқи маълумоти коршиносон, баръало маълум аст, ки занон дар кишварҳои рӯ ба тараққӣ бештар аз дигарон аз натиҷаи таъсири тағйирёбии иқлим осеб мебинанд. Дар баробари ин, нуктаи дигар ва он далелро бояд таъкид кард, ки занон инчунин бо қудрат ва қувваи бузурги худ қодир ҳастанд бо хатари афзояндаи офатҳои табиӣ, ки дар натиҷаи тағйирёбии иқлим пеш меояд, мубориза баранд. Занон дар кишварҳои рӯ ба тараққӣ бо назардошти афзоиши шумораи обхезӣ ва хушксолӣ, ки ба зиндагии онҳо таъсир мерасонанд, аллакай дар сафи пеши мутобиқшавӣ ба тағйирёбии иқлим қарор доранд. Занон ҳамчун истифодабарандагони асосии захираҳои табиӣ ва экологӣ барои пешгирӣ намудани таҳдидҳои афзояндаи табиӣ таҷриба ва донишашонро васеъ истифода мекунанд.

«Умед мебандем, ки ин талошҳо самараи нек медиҳанд ва ояндаи наздик мо шоҳиди он мешавем, ки ҷомеаи ҷаҳонӣ уҳдадориву амалҳои худро дар самти мубориза бо тағйироти иқлим, чӣ дар қисмати мусоидшавӣ ва чӣ дар қисмати коҳишдиҳӣ, аз ҷумла бо истифодаи аз неруи об суръати тоза мебахшад», — афзуд Ирина Костевич.

Зарангези ЛАТИФ,
АМИТ «Ховар»

АКС: АМИТ «Ховар»