То Истиқлолияти давлатӣ дар Тоҷикистон ҳамагӣ 17 масҷид фаъолият дошта, шумораи онҳо имрӯз ба беш аз 4 ҳазор расидааст

ДУШАНБЕ, 16.06.2024 /АМИТ «Ховар»/. Дар Тоҷикистон беш аз чор ҳазор масҷид фаъолият дорад. Дар ин хусус Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар паёми шодбошӣ ба муносибати иди Қурбон иттилоъ доданд.

«Ҳоло дар кишвари мо беш аз чор ҳазор масҷид дар хизмати намозгузорон қарор дорад, яъне ба 2000 – 2500 нафар як масҷид рост меояд», — таъкид намуданд Президенти мамлакат.

Дар идомаи ин гуфтаҳо Пешвои миллат мисол оварданд, ки ин нишондиҳанда дар кишварҳои аъзои Иттиҳоди Давлатҳои Мустақил 3 – 3,5 ҳазор ва дар мамолики дигари ҷаҳон 5 – 5,5 ҳазорро ташкил медиҳад.

Дар 70 соли замони гузашта, ба таъкиди Сарвари давлат, дар Тоҷикистон ҳамагӣ 17 масҷид фаъолият дошт.

Дар иртибот ба зиёрати хонаи Худо рафтани муъминон дар арафаи иди Қурбон Президенти мамлакат тазаккур доданд, ки дар кишвари соҳибистиқлоли мо дар асоси Конститутсия ба шаҳрвандон озодии виҷдон ва озодии пайравӣ ба дин кафолат дода шудааст ва давлату Ҳукумати мамлакат онро ҳамчун яке аз рукнҳои муҳимми ҳуқуқу озодиҳои инсон ҳифз ва таъмин менамояд.

АКС аз бойгонӣ