Кӯдакону наврасони деҳаи Зугванди ноҳияи Ишкошим дар истироҳатгоҳи «Шабдез»-и ноҳияи Роштқалъа қарор доранд

ХОРУҒ, 27.08.2024 /АМИТ «Ховар»/. Бо дастури Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  кӯдакону наврасони деҳаи Зугванди Ҷамоати деҳоти Зонги ноҳияи Ишкошим, ки бар асари омадани  сел хонаҳояшон пурра  ва қисман вайрон шудаанд, то соли нави таҳсил дар истироҳатгоҳи «Шабдез»-и ноҳияи Роштқалъа ба истироҳат фаро гирифта мешаванд. Ҳамчунин 13 сокини хурдсоли ин деҳа дар  басти сеюми  ин истироҳатгоҳ дам мегиранд.

Тавре ба мухбири минтақавии АМИТ «Ховар» Файз Мирасан сардори Раёсати маорифи Вилояти Мухтори Кӯҳистони Бадахшон  Аминҷон Мирзоқандов иттилоъ дод,  «он кӯдакону наврасоне,  ки хонаҳояшон аз офати табиӣ  пурра зарар дидааст, аз рӯзҳои аввали ин ҳодиса дар истироҳатгоҳи «Шабдез» дам мегиранд. Ҳамсолонашон аз ин деҳа, ки манзилҳояшон қисман вайрон шудаанд, бо навбат  ба истироҳат фаро гирифта мешаванд. Ҳоло дар  басти сеюм дар ин истироҳатгоҳ 52 нафар фароғат дорад, ки 32 нафараш аз деҳаи Зугванд мебошад».

Сардори Раёсати маорифи вилоят гуфт, ки  кӯдакону наврасон дар баробари ҳар гуна офати табию техногенӣ яке аз гурӯҳҳои осебпазири ҷомеа ба шумор мераванд ва аз ин рӯ бештар ба кумаки равонӣ, истироҳат ва дамгирӣ ниёз доранд. Мутахассисони соҳаи маориф бо баргузории маҳфилҳои мухталифи зеҳнию маърифатӣ, бозиҳои варзишию суннатӣ талош доранд, ки кӯдакону наврасон бо вазъу руҳияи ором, табъи хушу хотири ҷамъ ба саҳни мактаб қадам гузоранд. Дар ҳамин ҳол баъзе аз идораву муассисаҳои давлатӣ тасмим гирифтаанд, ки ин кӯдакону наврасонро бо либоси ягонаи мактабӣ ва асбобу ашёи хониш таъмин намоянд.

АКС: АМИТ «Ховар»