СОЛИ МАЪРИФАТИ ҲУҚУҚӢ. Вобаста ба баланд бардоштани маърифати ҳуқуқии аҳолӣ дар Шуғнон вохӯрӣ доир шуд
![](https://khovar.tj/wp-content/uploads/2024/09/SHugnon.jpg)
ДУШАНБЕ, 12.09.2024 /АМИТ «Ховар»/. Бахшида ба Соли маърифати ҳуқуқӣ имрӯз дар Мақомоти иҷроияи ҳокимияти давлатии ноҳияи Шуғнон вохӯрии Вазири адлияи Ҷумҳурии Тоҷикистон Музаффар Ашуриён бо сокинон ва намояндагони сохторҳои дахлдор оид ба баланд бардоштани маърифати ҳуқуқии аҳолӣ доир гардид. Дар ин хусус ба АМИТ «Ховар» дар Вазорати адлияи Ҷумҳурии Тоҷикистон иттилоъ доданд.
Раиси ноҳия Комил Шоисматуллозода вобаста ба 30-солагии Конститутсияи Ҷумҳурии Тоҷикистон ва Соли маърифати ҳуқуқӣ эълон гардидани соли 2024 иброз дошт, ки «Конститутсия нишонаи нахустин ва муҳимтарини соҳибистиқлолии давлат буда, аз ҷониби ҷомеаи ҷаҳонӣ ва кишварҳои дигар эътироф гардидани соҳибихтиёрии он аз ҳамин ҳуҷҷати тақдирсоз сарчашма мегирад».
Конститутсия ҳамчун бахтномаи миллат ва санади бунёдии сиёсӣ роҳи минбаъдаи пешрафту тараққиёти давлати озоду демократии моро муайян менамояд.
Вазири адлияи Ҷумҳурии Тоҷикистон Музаффар Ашуриён ҳадафи ин гуна суҳбату вохӯриҳоро таҳким бахшидани ҳамкории мақомот бо ҷомеа оид ба масъалаҳои баланд бардоштани маърифати ҳуқуқӣ, таҳкими худшиносиву худогоҳии ҷавонон, пешгирии кирдорҳои зиддиҳуқуқӣ байни ҷавонон ва дар якҷоягӣ бо аҳли ҷамоат муайян намудану рафъи сабабу шароите, ки ба ҳамроҳшавии ҷавонон ба ифротгароӣ мусоидат менамоянд, унвон намуд.
Баланд бардоштани маърифати ҳуқуқии аҳолӣ яке аз масъалаҳои асосии сиёсати ҳуқуқии мамлакат ба шумор рафта, аз рӯзҳои аввали ба даст овардани истиқлолияти давлатӣ ба ин раванд таваҷҷуҳи махсус равона гардид.
«Сатҳи баланди ташвиқу тарғиби Конститутсия, қонунҳои амалкунандаи Ҷумҳурии Тоҷикистон ва дигар санадҳои меъёрии ҳуқуқӣ яке аз асосҳои болоравии маърифати ҳуқуқии аҳолии мамлакат буда, шароит фароҳам меорад, ки шаҳрвандон масъулиятнок бошанд, меъёрҳои Конститутсия ва қонунҳоро риоя намоянд, аз ҳуқуқҳои худ пурра истифода баранд ва дар ҷамъият рафтори шоиста дошта, худогоҳу ватандӯст бошанд»,-баён дошт Вазири адлия.
Барои бунёди ҷомеаи демократӣ зарур аст, ки дар баробари ҳамаи тадбирҳои дигари бунёдкорӣ ҳамагон ҳамчун шаҳрванд ҳуқуқу озодӣ ва вазифаҳояшонро хеле хуб ва дар сатҳи зарурӣ донанд ва аз он самараноку пурмаҳсул истифода намоянд. Ҳамчунин дар зиндагии рӯзмарра қонун ва қоидаҳои қабулгардидаро дуруст ва бо камоли ақл амалӣ намоянд.
АКС: Вазорати адлияи Ҷумҳурии Тоҷикистон