Вазири маориф ва илм бо озмоишгоҳҳои таълимӣ ва илмию истеҳсолии Донишгоҳи техникии Тоҷикистон шинос шуд

ДУШАНБЕ, 23.10.2024 /АМИТ «Ховар»/. 22 октябр Вазири маориф ва илми Ҷумҳурии Тоҷикистон Раҳим Саидзода бо имконият ва шароити озмоишгоҳҳои таълимӣ ва илмию истеҳсолии Донишгоҳи техникии Тоҷикистон ба номи академик Муҳаммад Осимӣ шинос шуд, хабар медиҳад АМИТ «Ховар» бо истинод ба ин донишгоҳ.

Раҳим Саидзода дар озмоишгоҳҳои «Ташхиси обҳои партоб ва нӯшокӣ», «Гидравлика», «Ҳавокашӣ ва конденсиронии ҳаво», «Физикаи сохтмонӣ», «Газтаъминкунӣ», «Технологияи равандҳои сохтмонӣ», «Санҷиши сифати маҳсулоти сохтмонӣ» ва ғайра бо раванди корҳои амалӣ дар онҳо шинос гардид.

Вазири маориф ва илм таъкид дошт, ки ҷалби донишҷӯён ба озмоишгоҳҳои таълимӣ ва илмӣ-истеҳсолӣ барои амалӣ намудани донишҳои назариявӣ ва мутахассиси соҳибкасб шудани онҳо кумак мерасонад. Аз ин рӯ, зарур аст, ки донишҷӯён бо истифода аз шароити мавҷуда донишҳои назариявиро дар амал татбиқ намоянд.

АКС: Донишгоҳи техникии Тоҷикистон ба номи академик Муҳаммад Осимӣ