Байни Донишгоҳи давлатии ҳуқуқ, бизнес ва сиёсати Тоҷикистон ва Донишгоҳи Русия-Беларус шартномаи ҳамкорӣ ба имзо расид

ДУШАНБЕ, 28.11.2024. /АМИТ «Ховар»/. Тавре қаблан иттилоъ додем,  27 ноябр дар шаҳри Душанбе Форуми сеюми ректорони муассисаҳои таҳсилоти олии касбии Ҷумҳурии Тоҷикистон ва Ҷумҳурии Беларус таҳти унвони «Маориф-ҳамчун омили муҳим дар таҳкими робитаҳои дуҷониба байни Ҷумҳурии Тоҷикистон ва Ҷумҳурии Беларус» баргузор шуд.  

Дар доираи Форуми сеюми ректорони муассисаҳои таҳсилоти олии касбии Ҷумҳурии Тоҷикистон ва Ҷумҳурии Беларус  байни Донишгоҳи давлатии ҳуқуқ, бизнес ва сиёсати Тоҷикистон ва   Донишгоҳи давлатии технологии Брести Ҷумҳурии Беларус, инчунин байни Донишгоҳи давлатии ҳуқуқ, бизнес ва сиёсати Тоҷикистон ва Донишгоҳи Русия-Беларус шартномаи ҳамкорӣ ба имзо расонида шуд.

Ректори Донишгоҳи давлатии ҳуқуқ, бизнес ва сиёсати Тоҷикистон, доктори илмҳои иқтисодӣ Ҳомид Ҳошимзода иброз дошт, ки шартномаҳои ҳамкорӣ ба табодули донишҷӯёну устодон ва пешрафти кори донишгоҳҳо мусоидат менамоянд.

Дар форум намояндагони Вазорати маориф ва илми Ҷумҳурии Тоҷикистон ва Ҷумҳурии Беларус ва роҳбарони сохторҳои илмию таълимии ду давлат, аз ҷумла, ректорон ва намояндагони 13 муассисаи олии касбии Беларус иштирок доранд.

Ёдовар мешавем, ки Форуми сеюми ректорони муассисаҳои таҳсилоти олии касбии Тоҷикистон ва Беларус имрӯз низ дар ду бахш идома ёфта, баимзорасонии созишномаҳои нави ҳамкорӣ дар назар аст.

Ҳадафи асосии форум таҳия ва андешидани тадбирҳои зарурӣ оид ба таҳкими самтҳои афзалиятноки ҳамкории байнидавлатӣ дар соҳаи таҳсили олӣ ва илм, омӯхтани таҷрибаи пешқадам барои  баланд бардоштани сифати таҳсил, омода намудани мутахассисони варзида ва таҳкими муносибатҳои дӯстона мебошад.

АКС: Донишгоҳи давлатии ҳуқуқ, бизнес ва сиёсати Тоҷикистон