Дар Ашқобод ҷаласаи Комиссияи байнидавлатии ҳамоҳангсозии хоҷагии оби Осиёи Марказӣ доир шуд

ДУШАНБЕ, 07.11.2024 /АМИТ «Ховар»/. Иҷрои пешниҳодҳо ва ташаббусҳои Сарони давлатҳои таъсисдиҳандаи Фонди байналмилалии наҷоти Арал (ФБНА), ки дар саммитҳои Сарони давлатҳои таъсисдиҳандаи ин фонд баён гардида буд, дар ҷаласаи 87-уми Комиссияи байнидавлатии ҳамоҳангсозии хоҷагии оби Осиёи Марказӣ 6 ноябр дар Ашқобод баррасӣ шуд. Дар ин хусус ба АМИТ «Ховар» дар Вазорати энергетика ва захираҳои оби Ҷумҳурии Тоҷикистон иттилоъ доданд.

Дар ҷаласаи 87-уми Комиссияи байнидавлатии ҳамоҳангсозии хоҷагии оби Осиёи Марказӣ муовини якуми Вазири энергетика ва захираҳои оби Ҷумҳурии Тоҷикистон Ҷамшед Шоимзода, инчунин раиси Кумитаи давлатии хоҷагии оби Туркманистон, вазири хоҷагии оби Узбекистон ва вазири захираҳои об ва обёрии Қазоқистон табодули афкор намуданд.

Дар ҷаласа масъалаҳои марбут ба натиҷаҳои обгирӣ дар давраи нашъунамои соли 2024, меъёрҳои обгирӣ ва реҷаи кори силсилаобанборҳо дар давраи ғайринашъунамои солҳои 2024-2025 дар ҳавзаҳои дарёҳои Сир ва Аму ва дигар масъалаҳои марбут ба об баррасӣ гардиданд.

Аз натиҷаи ҷаласа Протокол ба имзо расид.

АКС: Вазорати энергетика ва захираҳои оби Ҷумҳурии Тоҷикистон