Дар Кувайт зарфияти сайёҳии Тоҷикистон муаррифӣ гардид
ДУШАНБЕ, 05.11.2024. /АМИТ «Ховар»/. Тавре қаблан иттилоъ додем, 4 ноябр дар шаҳри Ал-Кувайти Давлати Кувайт дар ҳошияи сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Форуми саноатӣ, сармоягузорӣ ва иқтисодии Тоҷикистон ва Кувайт баргузор гардид.
Дар доираи форум зарфияту имконоти сайёҳии Тоҷикистон барои саёҳатҳои экологӣ, аграрӣ, табобатию солимгардонӣ, гастрономӣ, кӯҳнавардӣ, фарҳангию таърихӣ, сайёҳии варзишӣ, саноатию тиҷоратӣ муаррифӣ гардид. Дар ин хусус ба АМИТ «Ховар» дар Кумитаи рушди сайёҳии назди Ҳукумати Ҷумҳурии Тоҷикистон хабар доданд.
Ҳоло дар Ҷумҳурии Тоҷикистон қариб 200 ширкати сайёҳӣ дар зиёда аз 50 хатсайр фаъолият дошта, гардишгарон барои шиносоӣ бо таърих, фарҳанг ва мавзеъҳои сайёҳии Тоҷикистон аз тамоми гӯшаву канори дунё сафар менамоянд.
Дар ин замина намояндагони бахши иқтисодии Давлати Кувайт, аз ҷумла масъулони соҳаи сайёҳӣ барои ҳамкорӣ ва таъсиси хатсайрҳои сайёҳӣ аз ду ҷониб- Кувайт ба Тоҷикистон ва аз Тоҷикистон ба Кувайт бо ҷалби дӯстдорони сайру саёҳат изҳори ҳавасмандӣ намуданд.
Дар намоишгоҳ анвои зиёди маҳсулоти саноатӣ ва зарфияту имконияти сайёҳӣ ба маъраз гузошта шуд. Иштирокдорони форум дар намоишгоҳи маҳсулоти саноатӣ бо зарфияту имконоти сайёҳии Тоҷикистон шинос гардиданд.
Меваҳои шаҳдбори тару тоза, хушкмеваҳо ва асали табиӣ, ки дар Тоҷикистон истеҳсол гардида, аз лиҳози экологӣ тоза ва ба саломатии инсон фоидабахшанд, писанди ҳар бинанда гардиданд. Ба ҳунари рассомони тоҷик низ баҳои баланд дода шуд.
Ҳамчунин маҳсулоти ҳунармандӣ, аз қабили ҳунарҳои гулдӯзию зардузӣ, чакандӯзӣ, атласу адрасбофӣ, абрешим ва маҳсулоти абрешимӣ, қолинбофӣ, маснуоти ороишии аз сангҳои табиӣ омодашуда, заргарию кулолгарӣ ва армуғону дигар туҳфаҳо аз маҳорат ва завқи баланди ҳунармандии тоҷикон дарак медод.
Ба иштирокчиён иттилоъ дода шуд, ки дар Ҷумҳурии Тоҷикистон бо иқдом ва ташаббуси Президенти Ҷумҳурии Тоҷикистон муҳтарам Эмомалӣ Раҳмон Стратегияи рушди сайёҳӣ барои давраи то соли 2030 ва Барномаи давлатӣ дар самти ҳунарҳои мардумӣ амал мекунанд, ки ин ду санад дар рушди соҳаи сайёҳӣ заминаи устувор мегузоранд.
Табиати зебои Тоҷикистон, дарёву кӯлҳо ва чашмаҳои шифобахш, боғу гулгашт ва дигар имконияту зарфияти сайёҳӣ ҳамчунин тавассути монитор, китобу буклет ва дигар воситаҳои тарғиботӣ бо чанд забон муаррифӣ гардид.
АКС: АМИТ «Ховар»
РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст
Пешвои миллат Эмомалӣ Раҳмон дар ҳудуди ноҳияи Данғара ба таври фосилавӣ Маркази хизматрасонии сайёҳӣ ва зиёда аз 50 километр роҳҳои мумфаршгардидаро ифтитоҳ намуданд
Имсол беш аз 30 ҳазор сайёҳон бо мавзеъҳои таърихии ноҳияи Восеъ шинос гардиданд
Дар нуҳ моҳ беш аз 1,5 миллион сайёҳ мавзеъҳои ҷолиби Тоҷикистонро тамошо намуданд
«САЙРИ МЕҲРГОН». Дар доираи ин хатсайр меҳмонони хориҷӣ бо таъриху суннатҳои ин ҷашни бостонӣ шинос шуданд
«САЙРИ МЕҲРГОН». Дар Душанбе ба макони таҷлили ин ҷашн хатсайри сайёҳии ройгон ташкил карда мешавад
«ДУШАНБЕ ИНВЕСТ-2025». Иштирокдорони Форуми байналмилалии сармоягузорӣ «Қалъаи Ҳисор»-ро тамошо намуданд
Дар шаҳри Панҷакент Маҷмааи фарҳангӣ, сайёҳӣ ва ҳунармандӣ ба истифода дода шуд
Донишгоҳи байналмилалии сайёҳӣ ва соҳибкории Тоҷикистон дар 9 моҳи соли 2025 фаъолияти назаррас дошт
Озмуни аксҳо таҳти унвони «Душанбе – шаҳри гулҳо ва зебоӣ» эълон гардид
Имсол ба Вилояти Мухтори Кӯҳистони Бадахшон беш аз 40 ҳазор сайёҳ ворид гардид
Сарвари давлат Эмомалӣ Раҳмон: «Шумораи сайёҳон аз Русия ба Тоҷикистон афзоиш ёфтааст»
