Намояндаи Тоҷикистон дар Форуми ректорони муассисаҳои таҳсилоти олии касбии давлатҳои Осиёи Марказӣ иштирок намуд

ДУШАНБЕ, 20.11.2024 /АМИТ «Ховар»/. Имрӯз, 20 ноябр дар шаҳри Бишкеки Ҷумҳурии Қирғизистон Форуми ректорони муассисаҳои таҳсилоти олии касбии давлатҳои Осиёи Марказӣ баргузор гардид. Дар форум беш аз 200 нафар роҳбарону намояндагони донишгоҳу донишкадаҳо иштирок намуданд, хабар доданд ба АМИТ «Ховар» дар  Донишгоҳи давлатии ҳуқуқ, бизнес ва сиёсати Тоҷикистон.

Дар Форуми ректорони давлатҳои Осиёи Марказӣ ректори Донишгоҳи давлатии ҳуқуқ, бизнес ва сиёсати Тоҷикистон, доктори илмҳои иқтисодӣ Ҳомид Ҳошимзода дар мавзуи «Ҳамкории байналмилалӣ ҳамчун заминаи баланд бардоштани сифати таҳсил» маъруза намуд. Дар маъруза ташкил намудани фазои ягонаи таҳсил дар муассисаҳои таҳсилоти олии касбии кишварҳои Осиёи Марказӣ таъкид гардид.

Дар ҷараёни форум байни донишгоҳҳои гуногуни давлатҳои Осиёи Марказӣ шартномаҳои ҳамкорӣ ба имзо расиданд.

Таъкид шуд, ки баргузории форум ба рушди ҳамкории дуҷонибаву бисёрҷониба дар соҳаи илму маориф мусоидат менамояд.

Дар анҷоми форум тавсияҳо оид ба ҳамкорӣ ва рушди муассисаҳои таҳсилоти олии касбии давлатҳои Осиёи Марказӣ пешниҳод шуданд.

АКС: Донишгоҳи давлатии ҳуқуқ, бизнес ва сиёсати Тоҷикистон