Сарвари давлат Эмомалӣ Раҳмон дар шаҳри Истаравшан корхонаи истеҳсоли антифризи ҶДММ «Кули Сарез»-ро мавриди истифода қарор доданд

Ноябрь 17, 2024 11:23

ДУШАНБЕ, 17.11.2024. /АМИТ «Ховар»/. 17 ноябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ ба шаҳри Истаравшан корхонаи истеҳсоли антифризи Ҷамъияти дорои масъулияти маҳдуди “Кули Сарез”-ро мавриди истифода қарор доданд.

Корхонаи мазкур дар заминаи ноил шудан ба ҳадафи чоруми миллӣ – саноатикунонии босуръати кишвар бо истифода аз имтиёзу имкониятҳои муҳайёнамудаи Ҳукумати Ҷумҳурии Тоҷикистон аз ҷониби соҳибкори маҳаллӣ Дилшод Холмаҳмадов, бо харҷи наздик як миллион сомонӣ бунёд ёфтааст. Техникаву таҷҳизоти истеҳсолӣ, сохти ширкатҳои пешрафтаи ҷаҳонӣ мебошад.

Корхона дар масоҳати 22 садяк замин бунёд шуда, дорои анбори нигоҳдории ашёи хом, маҳсулоти тайёр, ошхона ва иншооти ёрирасон мебошад. Дар ин корхона 17 нафар сокини маҳаллӣ, ки аз ин 9 нафарашонро занҳо ташкил медиҳанд, бо ҷойи корӣ таъмин шудаанд.

Ба Пешвои миллат муҳтарам Эмомалӣ Раҳмон иттилоъ доданд, ки иқтидори истеҳсолии корхона дар як сол 310 тонна антифриз буда, маҳсулоти воридотивазкунанда ба шумор меравад. То ҳол ин навъи маҳсулот барои нақлиёт ва марказҳои гармидиҳӣ аз хориҷи кишвар ворид карда мешавад.

Ҳамзамон дар корхона барои ҷойгир намудани моеи истеҳсолшуда, зарфҳои пластикии 1 ва 4,7 литра аз ашёи хом истеҳсол карда мешавад ва маҳсулоти истеҳсолӣ дар зарфҳо ҷойгир ва бо тамғаи истеҳсоли Тоҷикистон (Made in Tajikistan) ба мизоҷон аз шаҳру ноҳияҳои ҷумҳурӣ пешниҳод мегардад.

Моеи зидди ях, ки аввалин бор истеҳсоли он дар ин корхона ба роҳ монда шудааст, барои сардии аз 31 то 40 дараҷаи ҳаво пешбинӣ шудааст.

Дар корхона барои фаъолияти кормандон шароити лозима фароҳам оварда шудааст. Маоши миёнаи кормандон ҳоло то ду ҳазор сомониро ташкил дода, оянда бо афзун гардидани даромади корхона зиёд карда мешавад.

Сарвари давлат муҳтарам Эмомалӣ Раҳмон ба фаъолияти соҳибкори ватанӣ барои саҳмгузорӣ дар татбиқи ҳадафи чоруми миллӣ – саноатикунонии босуръати кишвар ва истеҳсоли маҳсулоти ивазкунандаи воридот баҳои баланд дода, вобаста ба зиёд намудани иқтидори истеҳсолӣ ва ба роҳ мондани содироти он дар оянда дастуру маслиҳатҳо доданд.

Пешниҳоди имтиёзу сабукиҳо ба бахши хусусӣ боиси дилгармии соҳибкорон дар самти бунёди корхонаҳои истеҳсолӣ гардида, ҳамчунин сабаби тақвияти иқтидори истеҳсолии кишвар ва ғанӣ гардидани бозори дохилӣ бо маҳсулоти саноатӣ шудааст.

Ба истифода додани корхонаи антифризи ҶДММ “Кули Сарез”-и шаҳри Истаравшан 17.11.2024

Ноябрь 17, 2024 11:23

Хабарҳои дигари ин бахш

Коргоҳи истеҳсоли пойафзоли шаҳри «Бӯстон» ба бозор маҳсулоти босифат ва рақобатпазир пешниҳод менамояд
Соли 2025 дар вилояти Суғд 84 корхонаю коргоҳи нав ба фаъолият шуруъ намуд
35-СОЛАГИИ ИСТИҚЛОЛИ ДАВЛАТӢ. Дар вилояти Суғд 84 корхонаю коргоҳи нав ба фаъолият шуруъ намуд
Маҷлиси Ҳукумати Ҷумҳурии Тоҷикистон баргузор шуд
НИШАСТИ МАТБУОТӢ. Донишгоҳи давлатии тиббии Хатлон ду бинои таълимӣ ва бинои хобгоҳи донишҷӯёнро ба истифода медиҳад
НИШАСТИ МАТБУОТӢ. Дар ноҳияи Данғара 6 муассисаи томактабӣ ба истифода дода мешавад
НИШАСТИ МАТБУОТӢ. Корхонаҳои хишти пухта, истеҳсоли маҳсулоти ширӣ ва парандапарварии ноҳияи Нуробод кай ба фаъолият шуруъ мекарда бошанд?
Пешвои миллат Эмомалӣ Раҳмон Вазири корҳои хориҷии Ҷумҳурии Исломии Эрон Аббоси Ароқчиро ба ҳузур пазируфтанд
НИШАСТИ МАТБУОТӢ. Бо мақсади саноатикунонии шаҳри Норак ҳашт корхонаю коргоҳи истеҳсолӣ ба истифода дода мешавад
Корхонаҳои саноатии Хуҷанд ба маблағи 214,7 миллион сомонӣ маҳсулот содирот намудаанд
35-СОЛАГИИ ИСТИҚЛОЛИ ДАВЛАТӢ. Дар Бохтар барои олимони соҳаи амнияти биологӣ ва радиатсионӣ бинои нав сохта мешавад
НИШАСТИ МАТБУОТӢ. Соли 2025 дар минтақаи Кӯлоб 20 иншоот бунёд мегардад