Озмуни шаҳрии «Беҳтарин донандаи китобҳои Пешвои миллат» ҷамъбаст гардид

ДУШАНБЕ, 11.01.2025. /АМИТ «Ховар»/. Озмуни шаҳрии «Беҳтарин донандаи китобҳои Пешвои миллат» аз рӯи се номинатсия ҷамъбаст гардид. Ғолибони ҷойи якум бо маблағи пулии 5 ҳазор сомонӣ, ҷойҳои дуюм бо 3 ҳазор сомонӣ ва ҷойҳои сеюм бо 2 ҳазор сомонӣ ва Диплом қадрдонӣ гардиданд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Душанбе иттилоъ доданд.

Дар номинатсия байни хонандагони муассисаҳои таҳсилоти миёнаи касбӣ ва умумӣ хонандаи Муассисаи таҳсилоти миёнаи умумии №53-и ноҳияи Исмоили Сомонӣ Файзигул Хайруллоева сазовори ҷойи якум, дар номинатсия байни донишҷӯёни муассисаҳои таҳсилоти миёна ва олии касбӣ донишҷӯйи Донишгоҳи миллии Тоҷикистон Ҳалима Сафарова соҳиби ҷойи якум ва дар номинатсия байни  хизматчиёни давлатӣ ва омма омӯзгори Гимназияи №3 барои хонандагони болаёқати шаҳри Душанбе Дилшод Ниёзов соҳиби ҷойи якум шуданд.

Дар озмуни шаҳрӣ 47 нафар иштирок намуда, донишу малакаи худро нишон доданд.

Ҳадаф аз баргузории Озмуни шаҳрии «Беҳтарин донандаи китобҳои Пешвои миллат»  арҷгузорӣ ба Истиқлолияти давлатӣ, сулҳ ва ризоияти миллӣ, мактаби давлатдорӣ, ваҳдатофаринӣ, инсондӯстӣ ва сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон  мебошад.

Бояд гуфт, ки таваҷҷуҳи иштирокчиён ба озмун зиёд гардида, дар он хонандагони муассисаҳои таҳсилоти миёнаи касбӣ ва умумӣ, донишҷӯёни муассисаҳои таҳсилоти миёна ва олии касбӣ, хизматчиёни давлатӣ ва сокинон иштирок менамоянд. Зеро китобҳои Пешвои миллат муҳтарам Эмомалӣ Раҳмон шахсро ба ватандӯстию ватанпарастӣ, инсондӯстӣ ва ваҳдатофаринӣ ҳидоят менамоянд.

 АКС: Мақомоти иҷроияи ҳокимияти давлатии шаҳри Душанбе