Вазири меҳнат, муҳоҷират ва шуғли аҳолии Тоҷикистон бо раис ва мудири иҷроияи Ширкати захираҳои инсонии «ARCO» мулоқот намуд

ДУШАНБЕ, 03.02.2025 /АМИТ «Ховар»/. Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода бо раиси Ширкати «ARCO»-и Арабистони Саудӣ оид ба захираҳои инсонӣ Шайх Фаҳд Аш-Шаммарӣ ва мудири иҷроияи ин ширкат доктор Файсал Ал-Ваълон мулоқот анҷом дод.

Тавре АМИТ «Ховар» бо истинод ба Сафорати Ҷумҳурии Тоҷикистон дар Арабистони Саудӣ хабар медиҳад, зимни мулоқот ҷонибҳо роҷеъ ба талаботи бозори меҳнат дар ду давлат, инчунин дар бораи абзори ҷалби қувваи корӣ аз Тоҷикистон ба Арабистони Саудӣ мубодилаи афкор намуданд.

Ёдовар мешавем, ки ҳайати Тоҷикистон дар Конфронси байналмилалии бозори меҳнат дар шаҳри Риёзи Подшоҳии Арабистони Саудӣ иштирок намуд.

АКС: Сафорати Ҷумҳурии Тоҷикистон дар Арабистони Саудӣ