Дар ҳамоиши фарҳангии «Рӯзи либоси миллӣ» дар Женева либосҳои тоҷикӣ ба намоиш гузошта шуданд

ДУШАНБЕ, 01.03.2025 /АМИТ «Ховар»/. ​27 феврал Намояндагии доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар ташкилоти байналмилалӣ дар Женева дар «Рӯзи либоси миллӣ», ки дар ҳошияи иҷлосиия 58-уми Шурои ҳуқуқи инсон баргузор гардид, иштирок намуд.

Тавре АМИТ «Ховар» бо истинод ба Намояндагии доимии Ҷумҳурии Тоҷикистон дар назди Шуъбаи Созмони Милали Муттаҳид дар Женева хабар медиҳад, зимни чорабинӣ гӯшаи миллии мамлакат оро дода шуда, дар он таъриху фарҳанги пурғановати миллати қадимии тоҷик ва ҳунарҳои мардумӣ, аз ҷумла чакан, сӯзанӣ, атласу адрас, либосҳои гулдӯзӣ ва таомҳои миллӣ ба намоиш гузошта шуданд.

Меҳмонони намоишгоҳ бо либосу анъанаҳои миллии Тоҷикистон шинос карда шуданд. Иброз гардид, ки чакан, сӯзанӣ, атласу адрас ва либосҳои гулдӯзӣ ҳамчун навъи ҳунарҳои мардумӣ дорои таърихи хеле қадимӣ буда, бо рӯзгор, расму оин ва ҷаҳони маънавии мардуми тоҷик иртиботи зич доранд.

АКС: Намояндагии доимии Ҷумҳурии Тоҷикистон дар назди Шуъбаи Созмони Милали Муттаҳид дар Женева