Дар Вазорати нақлиёт аз дастовардҳои роҳсозон аз Наврӯз то Наврӯз ёдовар шуданд

ДУШАНБЕ, 24.03.2025. /АМИТ «Ховар»/. Омадани фасли баҳору ҷашни Наврӯзро ҳамагон, бахусус мо роҳдорону роҳсозон бесаброна интизор мешавем, зеро бо фаро расидани фасли баҳор мушкилот паси сар мегардад. Барои таъмиру навсозии роҳҳо фурсати наву мусоид фаро мерасад. Аз Наврӯзи гузашта то ба Наврӯзи имсола роҳдорону роҳсозон, кормандони соҳаи нақлиёти автомобилӣ ва роҳи оҳани мамлакат ба дастовардҳои зиёд ноил гардиданд. Ин матлабро Вазири нақлиёти Тоҷикистон Азим Иброҳим зимни баргузории ҳамоиши идона бахшида ба Ҷашни байналмилалии Наврӯз, ки дар вазорат доир шуд, баён намуд.

Тавре ба АМИТ «Ховар» аз Вазорати нақлиёти мамлакат иттилоъ доданд, ҳамоиши идона бо тамошои дастархони наврӯзӣ, ки бо ҳафтсину ҳафтшин ва дигар таомҳои миллӣ ороста шуда буд, оғоз гардид. Иштирокдорони ҳамоиши идона ҳамчунин маҳсули ҳунарҳои мардумӣ ва намоиши либосҳои миллиро тамошо карданд.

Дар ҳамоиш иброз гардид, ки Наврӯз таърихи зиёда аз шашҳазорсола дорад ва куҳантарин ойини миллӣ дар ҷаҳон ба шумор меравад. Ривояту ҳикоятҳо дар бораи таърихи пайдоиши ин ҷашн зиёданд. Ин ҷашни бостонӣ, ки аз ниёгонамон ба мо мерос мондааст, на танҳо таърихи бой, балки маънию фалсафа ва ҳикмати зиёд ва арзиши гаронбаҳои илмӣ дорад.

«Мо бояд оинҳои неки ин ҷашни бостонии миллатамонро пос дошта, ба наслҳои оянда мерос гузорем. Барои кишварҳои ҳавзаи тамаддуни Наврӯз, бахусус Тоҷикистон боиси фараҳмандист, ки ин ҷашни аҷдодӣ маҳз бо пешниҳоди Президенти Ҷумҳурии Тоҷикистон муҳтарам Эмомалӣ Раҳмон аз ҷониби ЮНЕСКО соли 2009 ба Феҳристи мероси ғайримодии башарият шомил карда шуд. Аз ҷониби Созмони Милали Муттаҳид соли 2010 Наврӯз ҷашни байналмилалӣ эълон гардид. Ин дастоварди арзишманд натиҷаи азму талоши муштарак ва пайгириҳои чандинсолаи Тоҷикистон ва дастгирии давлатҳои дӯсту бародар буд»,- изҳор шуд дар ҳамоиш.

Иштирокдорон ёдовар шуданд, ки дар қатъномаи Созмони Милали Муттаҳид оид ба Рӯзи байналмилалии Наврӯз дарҷ гардидааст, ки давлатҳои аъзои Созмони бояд сатҳи огоҳиашонро дар бораи Наврӯз баланд бардошта, инчунин бо мақсади интишор ва тарғиби донишҳои марбут ба таърих ва суннатҳои наврӯзӣ ҳамасола тадбирҳо андешанд.

АКС: Вазорати нақлиёти Ҷумҳурии Тоҷикистон