Доир ба нақши Муҳаммад Хоразмӣ дар рушди илми ҷаҳонӣ машварати илмӣ-амалӣ баргузор шуд

ДУШАНБЕ, 12.03.2025 /АМИТ «Ховар»/. 11 март дар Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Тоҷикистон дар мавзуи «Муҳаммад Хоразмӣ ва нақши ӯ дар рушди илми ҷаҳонӣ» машварати илмӣ — амалӣ баргузор шуд, хабар медиҳад АМИТ «Ховар» бо истинод ба ин институт.

Дар машварат олимон саҳми ин олими барҷастаро дар рушди илми ҷаҳонӣ, бахусус риёзӣ, астрономӣ ва ғайра муҳим арзёбӣ  намуданд.

Зимнан дар мавзуъҳои «Муҳаммад Хоразмӣ-фарзанди фарзонаи халқи тоҷик ва падари математикаи Аврупо» ва «Тавсифи асарҳои риёзӣ ва астрономии Муҳаммад Хоразмӣ» маърузаҳо пешниҳод гардиданд.

Бояд гуфт, ки кашфиёту дастовардҳои илмии Муҳаммади Хоразмӣ дар фосилаи чандин аср аз тарафи олимони Аврупо ва дигар мамлакатҳои олам васеъ истифода шудаанд.

АКС: Институти таърих, бостоншиносӣ ва мардумшиносии ба номи Аҳмади Дониш