Намояндаи доимии Ҷумҳурии Тоҷикистон дар ҷаласаи ташкилии Конфронси оби СММ 2026 иштирок намуд
ДУШАНБЕ, 04.03.2025 /АМИТ «Ховар»/. 3 март Намояндаи доимии Ҷумҳурии Тоҷикистон дар Созмони Милали Муттаҳид Ҷонибек Ҳикмат дар ҷаласаи ташкилии Конфронси оби СММ 2026, ки дар қароргоҳи Созмони Милали Муттаҳид дар Ню-Йорк баргузор гардид, иштирок ва суханронӣ намуд. Дар ин хусус ба АМИТ «Ховар» аз Намояндагии доимии Ҷумҳурии Тоҷикистон дар Созмони Милали Муттаҳид хабар доданд.
Ҷонибек Ҳикмат аз баргузор намудани ин нишаст, ки бо ҳаммизбонии Сенегал ва Амороти Муттаҳидаи Арабӣ баргузор шуд, истиқбол намуда, зарурати тақвияти тадбирҳои глобалӣ барои расидан ба Ҳадафи рушди устувор 6 (SDG 6) – дастрасӣ ба оби тоза ва шароити беҳдоштро таъкид намуд.
Намояндаи доимӣ инчунин ба нақши калидии Тоҷикистон ҳамчун ҳаммизбони Конфронси оби СММ — 2023 ишора намуда, тазаккур дод, ки ин чорабинии сатҳи баланди ҷаҳонӣ аввалин чунин ҳамоиш дар панҷ даҳсолаи охир буд.
Ҷонибек Ҳикмат илова намуд, ки дар натиҷаи ин конфронси таърихӣ Стратегияи фарогири Созмони Милали Муттаҳид оид ба об ва беҳдошт қабул гардид ва Фиристодаи вежаи Дабири кулли Созмони Милали Муттаҳид оид ба об таъйин шуд, ки ҳадафи он таҳкими ҳамкории байналмилалӣ ва пайгирии натиҷаҳои конфронс мебошад.
Намояндаи доимии Ҷумҳурии Тоҷикистон дар Созмони Милали Муттаҳид дар робита ба Конфронси оби СММ 2026 таъкид кард, ки он бояд барои густариши татбиқи Рӯзномаи амали об заминаи устувор фароҳам оварад.
Инчунин иброз карда шуд, ки Тоҷикистон аз идомаи тамаркузи муколамаҳои интерактивии Конфронси соли 2023 истиқбол менамояд ва ҷонибдори он аст, ки мавзуи Даҳсолаи амалиёти об, ки пойдевори конфронсҳои солҳои 2023 ва 2026 мебошад, ҷузъи муҳими музокироти соли 2026 боқӣ монад.
Дар мавриди раванди тадорукот ба Конфронси соли 2026 омодагии қатъии Тоҷикистон барои таъмини ҳамкории дарозмуддати байналмилалӣ дар соҳаи об таъкид гардид.
Ӯ афзуд, ки Конфронси Созмони Милали Муттаҳид оид ба об дар соли 2028, ки Тоҷикистон онро мизбонӣ хоҳад кард, барои арзёбии пешрафтҳо ва таҳкими ҳамкории ҷаҳонӣ дар мудирияти захираҳои об имкони мусоид пешниҳод менамояд.
Дар фарҷом таъкид гардид, ки Тоҷикистон омода аст ҳамкориро бо низоми Созмони Милали Муттаҳид ва ҳамаи ҷонибҳои манфиатдор таҳким бахшида, обро дар меҳвари рушди устувор нигоҳ дорад. Аз ин рӯ, таъкид карда шуд, ки Тоҷикистон талошҳои худро аз соли 2023 то 2026 идома дода, барои омодагӣ ба Конфронси соли 2028 ва берун аз он мусоидат менамояд.
АКС: Намояндагии доимии Ҷумҳурии Тоҷикистон дар Созмони Милали Муттаҳид
Ҳамкории минтақавии кишварҳои Осиёи Марказӣ ва Эъломияи Хуҷанд дар Маркази Авруосиёи Шурои Атлантик баррасӣ шуд
Намояндаи Қазоқистон Нина Пиманкина: «Дар ташкили конфронсҳои байналмилалӣ мехоҳем аз таҷрибаи Тоҷикистон истифода намоем»
Иштирокдорони Конфронси чоруми оби Душанбе дар Қалъаи Ҳисор бо таърихи халқи тоҷик шинос шуданд
Татбиқи лоиҳаҳои афзалиятноки миллӣ ва минтақавӣ дар соҳаҳои кишоварзӣ, ҷангал ва ҳифзи муҳити зист баррасӣ гардид
Машваратҳои сиёсӣ байни вазоратҳои корҳои хориҷии Тоҷикистон ва Индонезия баргузор гардиданд
Дар Душанбе ҷаласаи навбатии комиссияи байниҳукуматии Тоҷикистону Эрон доир шуд
РАВАНДИ ОБИ ДУШАНБЕ. Пагоҳ иштирокдорони Конфронси оби Душанбе бо иқтидори обӣ ва ёдгориҳои таърихию фарҳангии Тоҷикистон шинос мешаванд
РАВАНДИ ОБИ ДУШАНБЕ. Сарвазири Тоҷикистон Конфронси чоруми байналмилалиро натиҷагирӣ намуд
РАВАНДИ ОБИ ДУШАНБЕ. Тоҷикистон мавқеи пешсафи худро дар пешбурди рӯзномаи ҷаҳонии об тасдиқ намуд
Умут Аҷар: «Дар Тоҷикистон чорабиниҳои байналмилалӣ дар сатҳи баланди ташкилӣ гузаронида мешаванд»
Сироҷиддин Муҳриддин: «Ҳамкории муассир ягона роҳи устувори ҳалли мушкилоти муштараки об мебошад»
РАВАНДИ ОБИ ДУШАНБЕ. Дар Душанбе ташаккули рӯзномаи ҷаҳонии об баъд аз соли 2030 баррасӣ шуд
