Зиёда аз 14 ҳазор духтарон тибқи квотаи президентӣ муассисаҳои таҳсилоти олиро хатм намуда, ба нафъи давлату ҷомеа фаъолият доранд

ДУШАНБЕ, 08.03.2025 /АМИТ «Ховар»/. «Ҳоло дар муассисаҳои таҳсилоти ибтидоиву миёна ва олии касбӣ, аз ҷумла дар хориҷи ҷумҳурӣ даҳҳо ҳазор нафар духтарони боистеъдоди мо ба таҳсил фаро гирифта шудаанд. Ҳалли масъалаҳои иҷтимоӣ, яъне соҳаҳои илму маориф ва тандурустӣ ва ҷалби ҳарчи бештари занону духтарон ба ин самтҳо ҳамеша дар меҳвари сиёсати давлату Ҳукумати мамлакат қарор дорад», — иброз доштанд Президенти Тоҷикистон муҳтарам Эмомалӣ Раҳмон 7 март зимни мулоқот бо занон бахшида ба Рӯзи Модар».

Пешвои миллат таъкид намуданд, ки танҳо дар даҳ соли охир 11 ҳазор нафар духтарон муассисаҳои таҳсилоти олии касбиро бо квотаи президентӣ хатм намудаанд.

Дар замони соҳибистиқлолӣ беш аз 256 ҳазор нафар духтарон баъди хатми муассисаҳои таҳсилоти олӣ соҳиби маълумоти олӣ ва касбу ҳунар гардиданд. Яъне, шумораи духтарону занони соҳиби маълумоти олӣ нисбат ба давраи қабл аз истиқлол қариб чор баробар афзудааст.

«Ҳоло боз 100 ҳазор нафар духтарон дар муассисаҳои таҳсилоти олии касбии мамлакат ва 13 ҳазор нафар дар мамлакатҳои хориҷӣ ба омӯхтани илму дониш ва касбу ҳунар машғул мебошанд.

Ташаббусҳои Ҳукумати Тоҷикистон ба афзоиши шумораи мутахассисони маълумоти олидор аз ҳисоби духтарони ноҳияҳои дурдасти ҷумҳурӣ такони ҷиддӣ бахшиданд.

Аз оғози таъсиси квотаи президентӣ зиёда аз 14 ҳазор нафар духтарони боистеъдоди мо, бахусус аз ноҳияҳои дурдаст муассисаҳои таҳсилоти олии мамлакатро бо истифода аз ин имконият хатм карда, ҳоло дар соҳаҳои гуногун ба нафъи давлату ҷомеа фаъолият доранд.

Дар замони соҳибистиқлолӣ беш аз 680 ҳазор нафар духтарону занон ҳамаи зинаҳои таҳсилоти касбиро хатм карда, соҳиби касбу ҳунар гардидаанд.

 АКС: Хадамоти матбуоти Президенти Ҷумҳурии Тоҷикистон