Дар Донишгоҳи технологии Тоҷикистон оид ба оила ва маърифати ҳуқуқии оиладорӣ ҳамоиш доир гардид

ДУШАНБЕ, 13.04.2025 /АМИТ «Ховар»/. Дар Донишгоҳи технологии Тоҷикистон дар мавзуи «Оила ва маърифати ҳуқуқии оиладорӣ дар ҷомеаи муосир» ҳамоиш баргузор шуд, хабар доданд ба АМИТ «Ховар» аз ин донишгоҳ.

Дар ҷамъомад пойдор намудани оила, одоби оиладорӣ, нигоҳ доштани расму оин, ҳифзи арзишҳои миллӣ, сарфаю сарриштакорӣ дар зиндагӣ, тақлид накардан ба бегонапарастӣ ва дигар масъалаҳо вобаста ба маърифати оиладорӣ баррасӣ шуданд.

Иброз гардид, ки самимияту вафодорӣ, муҳаббату садоқат ва ҳамдигарфаҳмию таҳаммулгароӣ, ки аз ҷумлаи беҳтарин арзишҳои инсонӣ маҳсуб мешаванд,  маҳз дар доираи оила ташаккул ёфтаанд. Мустаҳкамии оила низ замоне ба вуқуъ мепайвандад, ки ҳар аъзои оила вазифаи худро сари вақт иҷро намояд. Вазифаи аввалиндараҷаи зану шавҳар дуруст намудани рафтору кирдор ва гуфтор дар назди фарзандон мебошад.

Рукни асосии ҷомеа аз оила сарчашма мегирад. Ҷомеа замоне обод мешавад, ки агар оила солиму тифоқ ва бо муҳаббат поягузорӣ шуда  бошад.

АКС: Донишгоҳи технологии Тоҷикистон