Дар Хоруғ озмуни шаҳрии «Расми беҳтарин дар мавзуи бехатарӣ аз сӯхтор» баргузор гардид

ДУШАНБЕ, 13.04.2925  /АМИТ «Ховар»/. Дар шаҳри Хоруғ озмуни шаҳрии «Расми беҳтарин дар мавзуи бехатарӣ аз сӯхтор» баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлати шаҳри Хоруғ итилоъ доданд.

Ҳадафи озмун аз пешгирию бартараф намудани оқибатҳои сӯхтор ва риояи қоидаҳои бехатарӣ аз сӯхтор иборат буд. Озмун инчунин бо мақсади муайян намудани дониш, истеъдод ва малакаву маҳорати кӯдакону наврасон доир ба қоидаҳои бехатарӣ аз сӯхтор доир шуд.

Бо баргузор намудани чунин озмунҳо савияи дониши хонандагон дар муассисаҳои таълимӣ оид ба пешгирӣ намудани ҳодисаҳои нохуши сӯхтор баланд мегардад. Ҳамчунин ба хонандагон корҳои пешгирикунанда аз сӯхтор фаҳмонида мешаванд.

Ба ғолибон ва иштирокчиёни фаъоли озмун Ифтихорнома, мукофоти пулӣ ва туҳфаҳои хотиравӣ тақдим гардиданд.  Ғолибон барои иштирок дар озмуни вилоятӣ, ки охири моҳи апрел дар шаҳри Хоруғ баргузор мегардад, омодагӣ мебинанд.

АКС: АМИТ «Ховар»