«МегаФон Тоҷикистон» ва Лигаи футболи кӯдакону наврасон шартнома оид ба ҳамкорӣ бастанд

ДУШАНБЕ, 02.04.2025 /АМИТ «Ховар»/. Имрӯз ширкати «МегаФон Тоҷикистон» ва Лигаи футболи кӯдакону наврасон  шартнома оид ба ҳамкорӣ бастанд, хабар медиҳад АМИТ «Ховар». 

Акнун кӯдакони аз 8 то 14-сола имкони  иштирок дар  лоиҳаи «МегаФон Life бо сабки футбол»-ро пайдо намуданд. Мақсади лоиҳа рушди варзиш ва маъмулгардонии тарзи ҳаёти солим байни кӯдакон ва наврасон  мебошад.

Тавре директори Лигаи футболи кӯдакону наврасон Абдулло Соқиев изҳор дошт, мусобиқаҳои футбол дар тамоми шаҳрҳои калони ҷумҳурӣ гузаронида мешаванд. Барои иштирок ҳамаи хоҳишмандон дархости худро гузошта метавонанд- масалан, дастаро метавонанд аз ҳисоби ҳамсинфон ё ҳамсоягон ташкил кунанд.

Мусобиқа барои кашф кардан ва нишон додани истеъдодҳои варзишӣ, санҷидани неруи кӯдакон аз шаҳру ноҳияҳои гуногун  ҳангоми бозӣ, пайдо намудани дӯстону ҳамфикрон ва албатта, гирифтани таассуроти барҷаста аз бозии футбол–варзиши дӯстдоштаи миллионҳо нафар имкони хеле хуб хоҳад буд.

Директори Раёсати минтақавии ширкати «МегаФон Тоҷикистон» дар шаҳри Душанбе ва ноҳияҳои тобеи ҷумҳурӣ Далер Наимов изҳор дошт, ки  «ширкати «Мегафон Тоҷикистон» солҳои зиёд аст, ки бо Лигаи футболи кӯдакону наврасон ҳамкорӣ дорад. Ғолибони мусобиқаҳои мо ҳатто ба Британияи Кабир сафар намуда, бо дастаи мунтахаби «Челси» вохӯрӣ намуданд. Мақсади асосии лоиҳа рушди футболи тоҷик  ва омавигардонии он мебошад. Барои оммавӣ ва ҷаҳонӣ намудани ин намуди варзиш мо бояд аз кӯдакон оғоз намоем, чунки онҳо ояндаи мо мебошанд. Ширкати мо кайҳо боз футболи кӯдаконаро дастгирӣ менамояд. Мо  солҳои зиёд барои бачагони  хонаҳои кӯдакон ва мактаб-интернатҳо мусобиқаҳо доир менамоем. Доираҳои мусобиқаи нав ниҳоят васеъ ҳастанд: мо ҳамаи хоҳишмандонро барои иштирок даъват менамоем! Мақсади асосии  лоиҳаи «МегаФон Life бо сабки футбол» таъсиси майдони махсус барои  кӯдакону наврасон,  тарбия ва омода намудани ситораҳои асили футболи тоҷик дар оянда  мебошад. Агар ин ниятҳои мо амалӣ гарданд. мо аз он, албатта, шод хоҳем гашт».

«Имрӯз боиси хушнудист, ки мо бо ширкати мобилии «Мегафон Тоҷикистон» созишномаи ҳамкорӣ ба имзо расонидем. Дар доираи ин лоиҳа мо дар байни кӯдакону наврасони се гурӯҳи синнусолӣ- то 7, 9 ва 11-сола  дар тамоми манотиқи ҷумҳурӣ мусобиқа баргузор менамоем.  Лигаи футболи кӯдакону наврасон  дар ҳамкорӣ бо ширкати «Мегафон Тоҷикистон» солҳои қаблӣ низ мусобиқаҳо баргузор менамуд, ки ғолибони ин мусобиқаҳо ҳатто ба шаҳри Сочии Федератсияи Русия сафар намуданд. Мо умед дорем, ки чунин сафарҳо солҳои наздик боз аз нав амалӣ мешаванд. Футбол на танҳо бозӣ аст. Ин варзиши даставие аст, ки барои муттаҳид сохтани малакаҳои гуногуни шахсӣ ва ҳамзамон такмилу инкишоф додани кӯдакон нақши муҳим мебозад. Ҳамкорӣ бо ширкати «МегаФон Тоҷикистон» имкон медиҳад, ки қадами муҳим дар рушди футболи кӯдакон гузошта шавад.  Ба василаи он садҳо ва ҳазорҳо кӯдакон дар қаламрави ҷумҳурӣ иқтидори худро дар ин самт кашф ва дар амал татбиқ хоҳанд намуд», — иброз дошт  директори Лигаи футболи кӯдакону наврасон Абдулло Соқиев.

АКС: ширкати «МегаФон Тоҷикистон»