Ҳоким Холиқзода бо Антонелла Бассани вохӯрӣ намуд

ДУШАНБЕ, 23.04.2025. /АМИТ «Ховар»/. 22 апрел дар ҳошияи баргузории ҷаласаҳои баҳории Гурӯҳи Бонки ҷаҳонӣ ва Хазинаи Байналмилалии Асъор ҳайати Тоҷикистон бо роҳбарии муовини якуми Сарвазири мамлакат Ҳоким Холиқзода бо муовини Президенти Бонки ҷаҳонӣ оид ба Аврупо ва Осиёи Марказӣ хонум Антонелла Бассани вохӯрӣ намуд. Дар ин хусус ба АМИТ «Ховар» аз Вазорати молияи Ҷумҳурии Тоҷикистон иттилоъ доданд.

Дар вохӯрӣ ҷонибҳо раванди татбиқи лоиҳаҳои амалкунанда ва дурнамои таҳкими ҳамкориро дар заминаи ислоҳоти иқтисодӣ, идоракунии молияи давлатӣ, захираҳои энергетикӣ, рушди иқтисоди рақамӣ ва маблағгузории устувор баррасӣ намуданд.

Ҳамчунин дар вохӯрӣ ба масъалаи татбиқи Барномаи ислоҳотии «Амалиёти сиёсии рушд», ки ба такмили муҳити сармоягузорӣ, баланд бардоштани самаранокии идоракунии молиявӣ ва таҳкими фишангҳои сиёсати макроиқтисодӣ равона шудааст, таваҷҷуҳи хосса зоҳир гардид.

Инчунин ҷонибҳо доир ба муҳимияти таҳияи «Стратегияи нави ҳамкорӣ байни Ҷумҳурии Тоҷикистон ва Бонки ҷаҳонӣ (Country Partnership Framework – CPF) барои солҳои 2026–2030» иброз намуданд, ки «бояд дар асоси таҳлили амиқи имконот самтҳои афзалиятнок, аз ҷумла таъсиси ҷойи нави кор, рушди захираҳои инсонӣ, рақамикунонии иқтисодиёт ва пешгирии пайомадҳои тағйирёбии иқлим таҳия гарданд».

АКС: Вазорати молияи Ҷумҳурии Тоҷикистон